ირაკლი ღარიბაშვილი - მნიშვნელოვანია ჰესები ავაშენოთ, მაგრამ გონივრულად

მნიშვნელოვანია ჰესები ავაშენოთ, მაგრამ გონივრულად, - ამის შესახებ პრემიერ-მინისტრმა ირაკლი ღარიბაშვილმა დღეს მთავრობის 3-წლიანი მუშაობის ანგარიშის წარდგენისას განაცხადა.

როგორც პრემიერმა ჰესების მშენებლობაზე საუბრისას განაცხადა, მთავრობა ყველა პროექტს ყურადღებით სწავლობს და მხოლოდ ამის შემდეგ იღებს გადაწყვეტილებას.

"მე ძალიან კარგად მესმის, რომ მოსახლეობაში შეიძლება იყოს გარკვეული კითხვები ჰესების მშენებლობის თაობაზე, მაგრამ მინდა განვუმარტო მოსახლეობას ჩვენი პოზიცია: იმისათვის, რომ მსოფლიოს სწრაფი განვითარებისგან განზე არ ვიყოთ, განვითარებული ინდუსტრია, მატერიალური რესურსები, შესაბამისად, მეტი ენერგია გვესაჭიროება. ამიტომ არის მნიშვნელოვანი, რომ ჰესები ავაშენოთ, მაგრამ რა თქმა უნდა, უნდა ავაშენოთ გონივრულად. ჩვენ კარგად გვესმის ჩვენი ბუნების ფასი. ასე რომ, მე გარწმუნებთ, რომ ჩვენ ყველა პროექტს მაქსიმალურად გონივრულად ვსწავლობთ და ამის შემდეგ ვღებულობთ გადაწყვეტილებას", - განაცხადა ირაკლი ღარიბაშვილმა.