პაშა ბანკის საქველმოქმედო საახალწლო საჩუქარი ფონდს „პირველი ნაბიჯი საქართველო“

2015 წლის 26 დეკემბერს პაშა ბანკმა საქველმოქმედო ორგანიზაცია „პირველ ნაბიჯ საქართველოს“ გამორჩეულად მიულოცა ახალი წელი : ბანკმა ფონდს საჩუქრად გადასცა რუსუდან ფეტვიაშვილის ნახატი „არჩევანი“ (2015, შერეული ტექნიკა, აბრეშუმი, 50*50სმ) მისი პირდაპირი ან აუქციონის გზით რეალიზაციის უფლებით.

ნახატის გაყიდვიდან მიღებული თანხა სრულად მოხმარდება აღნიშნული ფონდის ბენეფიციარებს - შეზღუდული შესაძლებლობების მქონე ბავშვების და ახალგაზრდების სწავლა-განვითარებას.

ბანკმა წელს „პირველ ნაბიჯ საქართველოს“ ბენეფიციარებს სააღდგომო დღესასწაულიც მიულოცა და თავისი პარტნიორების სახელით ფონდს 10 000 ლარი გადაურიცხა.

„პაშა ბანკისთვის კორპორატიული სოციალური პასუხისმგებლობა ყოველდღიური საქმიანობის მნიშვნელოვანი ნაწილია. მოხარული ვართ, რომ გვაქვს საშუალება საახალწლო სიხარული თანაბრად გავუზიაროთ როგორც ჩვენს პარტნიორ ორგანიზაციებს, ასევე საქველმოქმედო ფონდს „პირველი ნაბიჯი საქართველო“. ვიმედოვნებთ, რომ ჩვენი მცირედი, მაგრამ გულითადი საჩუქარი დადებითად აისახება ფონდის ბენეფიციარების კეთილდღეობაზე,“- თქვა შაჰინ მამმადოვმა, პაშა ბანკის გენერალურმა დირექტორმა.

“უკვე 17 წელზე მეტია, რაც ფონდი „პირველი ნაბიჯი საქართველო“ დახმარებას უწევს შეზღუდული შესაძლებლობების მქონე ბავშვებს და ახალგაზრდებს, რომელთა უმრავლესობა სოციალურად დაუცველი ოჯახებიდან არის. 2015 წელს ფონდმა წამოიწყო ახალი პროგრამა, რომელიც ნებისმიერ მსურველს აძლევს საშულებას, გახდეს ფონდის ბენეფიციარის დონორი და დააფინანსოს მისი სწავლა-განვითარება. პაშა ბანკი ერთ-ერთი პირველი ჩაერთო ამ პროგრამაში. აღნიშნული საჩუქარი ასევე დიდი დახმარებაა ჩვენი ფონდისთვის და მისი გაყიდვიდან მიღებული თანხა სრულად მოხმარდება ჩვენს ბავშვებს. „პირველი ნაბიჯი საქართველოს“ სახელით მსურს მადლობა გადავუხადო პაშა ბანკს ასეთი მაღალი სოციალური პასუხისმგებლობისთვის,” - თქვა თინათინ დოლიძემ, „პირველი ნაბიჯი საქართველოს“ მარკეტინგის მენეჯერმა.

პაშა ბანკი ბაქოში სათაო ოფისის მქონე ფინანსური ინსტიტუტია, რომელიც ოპერირებს აზერბაიჯანში, საქართველოსა და თურქეთში. პაშა ბანკი მსხვილ და საშუალო ზომის საწარმოებს სთავაზობს კორპორატიული და საინვესტიციო საბანკო მომსახურების სრულ სპექტრს.

პაშა ბანკი არის პაშა ჯგუფის ნაწილი, რომელიც თავის მხრივ წარმოადგენს აზერბაიჯანის წამყვან საინვესტიციო ჰოლდინგს და ფლობს აქტივებს ისეთ სფეროებში, როგორიც არის დაზღვევა, კორპორატიული და საცალო საბანკო საქმიანობა, ქონების მართვა, მშენებლობა და ტურიზმი. ჰოლდინგის კაპიტალი 2014 წლის დეკემბრის მდგომარეობით აღემატება 3 მილიარდ ევროს.

პაშა ბანკმა საქართველოში ფუნქციონირება 2013 წლის თებერვალში დაიწყო. მისი სააქციო კაპიტალი 103 მილიონ ლარს შეადგენს.

პაშა ბანკი მდებარეობს თბილისში: შოთა რუსთაველის გამზირის 15.

საკონტაქტო პირი: ანანო ქორქია, საზოგადოებასთან ურთიერთობის და მარკეტინგის დეპარტამენტი.

ტელეფონი: (+995) 322 265 000 (7057)

ელფოსტა: anano.korkia@pashabank.ge

pashabank.ge

(R)