საქართველოში პოლონური კომპანიის Plagiat.pl წარმომადგენლები იმყოფებოდნენ

საქართველოში პოლონური კომპანიის Plagiat.pl წარმომადგენლები სამუშაო ვიზიტით იმყოფებოდნენ. აღნიშნული კომპანია არის ანტი-პლაგიატის პროგრამული უზრუნველყოფის ლიდერი პოლონეთისა და რუმინეთის ბაზარზე. როგორც სამინისტროში აცხადებენ, კომპანიის აღმასრულებელი დირექტორი, სებასტიან კავჩინსკი და დელეგაციის სხვა წევრები საქართველოს განათლებისა და მეცნიერების მინისტრის მოადგილეს, გიორგი შარვაშიძეს შეხვდნენ და თავიანთი გამოცდილება გაუზიარეს.

პოლონური კომპანიის მომსახურებით მსოფლიოში 230-ზე მეტი უნივერსიტეტი სარგებლობს. პლაგიატი წარმოადგენს გლობალურ პრობლემას და საფრთხეს უქმნის განათლების ხარისხს, შესაბამისად, კომპანიის მისიაა დაიცვას განათლების უმაღლესი სტანდარტები და ხელი შეუშალოს პლაგიატს სტუდენტებსა და დოქტორანტებს შორის. Plagiat.pl წარმომადგენლები არიან სწორედ იმ საკონსულტაციო ორგანოს წევრები, რომელმაც შექმნა კანონი ყველა სამაგისტრო და საბაკალავრო ნაშრომების სავალდებულო ვერიფიკაციაზე. ქართული აკადემიური სივრციდან პლაგიატის აღმოსაფხვრელად და განათლების ხარისხის გასაუმჯობესებლად, სამინისტროს ხელმძღვანელობა მზადაა გაეცნოს და გაიზიაროს სხვა ქვეყნების წარმატებული გამოცდილება.