ეკონომიკის სამინისტრო კომპანიას, რომელიც ანაკლიის პორტის პროექტს განახორციელებს, სავარაუდოდ, 12 დღეში დაასახელებს
ეკონომიკისა და მდგრადი განვითარების სამინისტრო კომპანიას, რომელიც ანაკლიის პორტის პროექტს განახორციელებს, სავარაუდოდ, 12 დღეში დაასახელებს , - ამის შესახებ ქუმსიშვილმა დღეს გამართულ პრესკონფერენციაზე მსხვილი ინფრასტრუქტურული პროექტების კომენტირებისას განაცხადა.
"რაც შეეხება მსხვილ ინფრასტრუქტურულ პროექტებს. რა თქმა უნდა, პირველი - ეს არის აღმოსავლეთ-დასავლეთის მაგისტრალი. ვიცით, რომ ეს პროექტი ჩვენი ქვეყნისთვის ძალიან მნიშვნელოვანია. ინფრასტრუქტურის სამინისტრომ მიიღო დავალება, რომ მათ უნდა წარმოადგინონ მაქსიმალურად შემჭიდროებული ვადები ამ პროექტის დასრულებისა. ანუ თუ პროექტის დასრულების ვადად განსაზღვრული იყო 2021 წელი, მან ვადა უნდა შეამციროს 2020 წლამდე. თავისი მასშტაბით ეს არის ძალიან დიდი პროექტი, დასახარჯია კიდევ 4,5/5 მილიარდი ლარი და ჩვენ ვსაუბრობთ პროცესების მნიშვნელოვან დაჩქარებაზე", - განაცხადა დიმიტრი ქუმსიშვილმა.
ვიცე-პრემიერმა ანაკლიის პორტის საკითხზეც ისაუბრა და აღნიშნა, რომ ჩამოსული არიან კონსულტანტები და მთავრობა მათთან აქტიურად მუშაობს.
კითხვაზე, გამკაცრდა თუ არა პირობები, ქუმსიშვილმა აღნიშნა, რომ არ გამკაცრებულა.
"განგიმარტავთ - იმისათვის, რომ ინვესტორს შევუთანხმდე, პირველ რიგში აკეთებ იმას, რომ გარკვეულ ნაწილზე უთანხმდები წინასწარ და რაღაც ნაწილზე მას შემდეგ შეუთანხმდები, რაც გამარჯვებულად გამოაცხადებ. ჩვენ ამ წუთში სიტყვის კარგი გაგებით - ვვაჭრობთ, რა ნაწილზე შევთანხმდეთ დღეს და რა ნაწილი იქნება გამოცხადების შემდეგ შესათანხმებელი გამარჯვებულ კომპანიასთან იმისთვის, რომ სახელმწიფოს ინტერესები მაქსიმალურად იყოს დაცული", - აღნიშნა ეკონომიკის მინისტრმა.
კითხვაზე, საბოლოო ვადა როდის არის და როდის გამოცხადდება გამარჯვებული კომპანია - ქუმსიშვილმა ჟურნალისტებს განუცხადა, რომ "ამისთვის მის კალენდარში 12 დღეა განსაზღვრული", თუმცა მაინც ზუსტი თარიღის დაკონკრეტებისგან ვიცე-პრემიერი თავს იკავებს.