აჭარის ტურიზმის დეპარტამენტის სატრენინგო-საკონსულტაციო ცენტრში ტრენინგები დაიწყო

აჭარის ტურიზმის დეპარტამენტის სატრენინგო-საკონსულტაციო ცენტრში ტრენინგები დაიწყო. როგორც აჭარის ტურიზმის დეპარტამენტში აცხადებენ, პირველი ტრენინგი სასტუმროებისა და კვების ობიექტების დასუფთავების სამსახურის თანამშრომლებს მოწვეულმა ტრენერმა სასტუმრო "დივან სუითის" დასუფთავების სამსახურის მენეჯერმა ჯეირან ბეჟანიძემ ჩაუტარა.

მათივე ინფორმაციით, შეხვედრაზე ძირითადათ აქცენტი სასტუმროებსა და კვების ობიექტებში დასუფთავების ხარისხის ამაღლებასა და მინიმალური სტანდარტების დამკვიდრებაზე გაკეთდა.

რეგიონში მომსახურების ხარისხის გაუმჯობესების მიზნით დეპარტამენტის სატრენინგო-საკონსულტაციო ცენტრი ერთდღიან ტრენინგებს სასტუმროების, რესტორნებისა და ტურსააგენტოების მოქმედი თანამშრომლებისთვის ყოველკვირეულად ჩაატარებს. ტრენინგებს სატრენინგო-საკონსულტაციო ცენტრი და მის მიერ მოწვეული ტრენერები სტუმრის მომსახურების, დასუფთავების, უსაფრთხოების, რეზერვაციისა და ხარისხის ამაღლების საერთაშორისო სტანდარტების თემაზე ჩაატარებს.

საკონსულტაციო ცენტრის მიერ დაგეგმილი ტრენინგების შესახებ ინფორმაცია რეგულარულად განახლდება მოცემულ ვებ გვერდზე Recommend.ge. სურვილის შემთხვევაში, ასევე შესაძლებელია დარგში არსებული პრობლემის აღმოფხვრის მიზნით, კერძო სექტორის წარმომადგენელმაც მიმართოს ცენტრს კონსულტაციის ან სასურველი ტრენინგის განხორციელების ინიციატივით.

ცენტრი არსებობს აჭარის ტურიზმისა და კურორტების დეპარტამენტის ბაზაზე და მის მიერ შეთავაზებული ტრენინგები თუ კონსულტაციები სრულიად უფასოდაა ხელმისაწვდომი კერძო სექტორის წარმომადგენელთათვის.