გორისა და ქარელის რამდენიმე სოფელში ასფალტის საფარიანი გზა პირველად იგება

საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის თავმჯდომარის მოადგილემ ირაკლი ლითანიშვილმა გორი-ქარელის გზის ექვს კილომეტრიანი მონაკვეთის სარეაბილიტაციო სამუშაოები დაათვალიერა. პროექტი სამინისტროს საავტომობილო გზების დეპარტამენტის დაკვეთით ხორციელდება.

როგორც "ინტერპრესნიუსს" საქართველოს რეგიონული განვითარებისა და ინფრასტრუქტურის სამინისტროდან აცნობეს, პროექტი მოიცავს: გზის სავალ ნაწილზე ასფალტ-ბეტონის საფარის დაგებას; რკინაბეტონის კიუვეტებისა და გაბიონების ქვედა საყრდენი კედლების, ადგილობრივ გზებთან მიერთების, მოსახლეობის ეზოებში შესასვლელებისა და საგზაო ნიშნების მოწყობას; წყალგამტარი მილებისა და ბეტონის ღარების შეკეთებას. ასევე, გზის შემოფარგვლასა და ჰორიზონტალურ მონიშვნას.

"ამ ეტაპზე, სარეაბილიტაციო მონაკვეთის 2 კმ-ზე უკვე დასრულებულია სარეაბილიტაციო სამუშაოები და გაბიონებისა და კიუვეტების მოწყობა დარჩენილ 4 კილომეტრზე მიმდინარეობს. აღნიშნული მონაკვეთი ქარელისა და გორის მუნიციპალიტეტების მჭიდროდ დასახლებულ სოფლებზე: ღვლებზე, ქვენაფლავსა და რიეთზე გადის, სადაც ასფალტ-ბეტონის საფარიანი გზა არასდროს ყოფილა", - აცხადებენ სამინისტროში.

მათივე ინფორმაციით, სარეაბილიტაციო სამუშაოები 2015 წლის სექტემბერში დაიწყო და მიმდინარე წლის ზაფხულში დასრულდება. სამუშაოები სახელმწიფო ბიუჯეტიდან ფინანსდება და მისი საერთო ღირებულება 1 მილიონ 744 ათასი ლარია.