ზურაბ ჭიაბერაშვილის განცხადებით, "ჰუმანითი-ჯორჯიას" გარშემო ბევრი კითხვა ჩნდება
"ერთიანი ნაციონალური მოძრაობის" სამოქალაქო საზოგადოებასთან ურთიერთობის მდივან ზურაბ ჭიაბერაშვილის განცხადებით, "ჰუმანითი-ჯორჯიას" გარშემო ბევრი კითხვა ჩნდება, რომელიც კორუფციასთან და ხარისხთანაა დაკავშირებული.
როგორც "ერთიან ნაციონალური მოძრაობაში" აცხადებენ, ჭიაბერაშვილი მიიჩნევს, რომ საქართველოს გაღარიბებული მოქალაქეებისათვის ძნელად ხელმისაწვდომი მედიკამენტების გაიაფების მოთხოვნას მთავრობა იმით პასუხობს, რომ გაურკვეველი წარმოშობის ახლად შექმნილ კომპანიაში მოქალაქეების ფულს დებს და არ პასუხობს შესაძლო კორუფციული სქემის არსებობასთან დაკავშირებულ მნიშვნელოვან კითხვებს.
"ბოლო 3 კვირის განმავლობაში ქართულ მედიაში ვრცელდება ინფორმაცია გაურკვეველი წარმოშობის ახლად შექმნილ კომპანია "ჰუმანითი-ჯორჯიაში" საპარტნიორო ფონდის დირექტორის, დავით საგანელიძის პირადი დაინტერესებით მონაწილეობის შესახებ.
დავით საგანელიძის განცხადებით, კომპანიის უკან - იმის მიუხედავად, რომ ოფიციალურად არსად ფიგურირებს - ბიძინა ივანიშვილის მეგობარი ალექსანდრე მაშკევიჩი დგას. სწორედ მაშკევიჩის საინვესტიციო შესაძლებლობებით ამართლებს საპარტნიორო ფონდის დირექტორი კომპანია "ჰუმანითი-ჯორჯიასათვის" ჩვენი, გადასახადის გადამხდელთა 30 მლნ ლარის მიცემას.
საპარტნიორო ფონდის წესდება კომპანიის მხრიდან თანაინვესტირებას ითვალისწინებს, თუმცა ეს დოკუმენტურად არ დასტურდება. უფრო მეტიც, კომპანიის შესახებ საჯაროდ არსებული დოკუმენტაცია სიყალბის ნიშნებს შეიცავს. კერძოდ, "ჰუმანითი-ჯორჯიას" მიერ 2015 წლის ივნისში 900,000 ლარად განვადებით აღებული ქონება 2015 წლის სექტემბერში 30 მლნ ლარად არის შეფასებული. სწორედ ამ მეთოდით შეასრულა კომპანიამ თანაინვესტირების ვალდებულება.
საქართველოს გაღარიბებული მოქალაქეებისათვის დღეს ასე ძნელად ხელმისაწვდომი მედიკამენტების გაიაფების მოთხოვნას მთავრობა იმით პასუხობს, რომ გაურკვეველი წარმოშობის ახლად შექმნილ კომპანიაში ჩვენს ფულს დებს და არ პასუხობს შესაძლო კორუფციული სქემის არსებობასთან დაკავშირებულ მნიშვნელოვან კითხვებს", - აცხადებს ზურაბ ჭიაბერაშვილი.
მისივე თქმით, გარდა დავით საგანელიძისა, კითხვებს ჯანდაცვის მინისტრმა, დავით სერგეენკომაც უნდა უპასუხოს. რადგანაც ჭიაბერაშვილი მიიჩნევს, რომ სწორედ მისი ვალდებულებაა, ქართველმა პაციენტმა იცოდეს, რომ იგი ხარისხიან მედიკამენტს იღებს.
"დავით სერგეენკომ უნდა ახსნას: რატომ და როგორ აღმოჩნდა სახელმწიფოს ხელთ არსებული სამედიცინო დაწესებულებები ასევე ახლად შექმნილ "ალფა-მედიკის" ხელში, რომლის უკანაც ისევ "ჰუმანითი-ჯორჯიას" ოფიციალური დამფუძნებელი დგას; და არის თუ არა ჯანდაცვის სფეროში დღეს მიმდინარე პროცესები იმის დასტური, რომ სახელმწიფო სახსრებით კერძო პირები ბაზარზე უპირატესი მდგომარეობის მოპოვებას ცდილობენ?"- ნათქვამია ზურაბ ჭიაბერაშვილის განცხადებაში.