გურიის გუბერნატორი მსოფლიო ბანკის სამხრეთ კავკასიის რეგიონულ დირექტორს შეხვდა
გურიის გუბერნატორი, გია სალუქვაძე მსოფლიო ბანკის სამხრეთ კავკასიის რეგიონულ დირექტორს, მერსი ტემბონს შეხვდა.
როგორც გუბერნატორის პრესსამსახურში აცხადებენ, მსოფლიო ბანკის ოფისში გამართულ შეხვედრაზე გურიის რეგიონის ტურისტული პოტენციალის შესახებ ისაუბრეს და მსოფლიო ბანკის მიერ საქართველოს რამდენიმე რეგიონში განხორციელებული (დაფინანსებული) რეგიონული განვითარების პროგრამა განიხილეს.
"მინდა მადლობა გადავუხადო მსოფლიო ბანკის სამხრეთ კავკასიის რეგიონულ დირექტორს სრული მხარდაჭერისთვის. დღეს ჩვენ საკმაოდ ნაყოფიერი შეხვედრა გვქონდა. ბანკის რეგიონულმა დირექტორმა გურიაში სტუმრობის სურვილი გამოთქვა და შევთანხმდით ურთიერთთანამშრომლობაზეც. ის მზად არის თავის გუნდთან და შესაბამის უწყებებთან ერთად, დაიწყოს მოლაპარაკება რეგიონული განვითარების პროგრამის განხორციელებისათვის, რომლის საბოლოო მიზანს არსებული სიღარიბის აღმოფხვრა წარმოადგენს", - აღნიშნა გია სალუქვაძემ.
აღსანიშნავია, რომ 1992 წლიდან საქართველო მსოფლიო ბანკის წევრია და ამჟამად ბანკში გაერთიანებულია ხუთი ინსტიტუტი: რეკონსტრუქციისა და განვითარების საერთაშორისო ბანკი (International Bank for Reconstruction and Cooperation - IBRD); საერთაშორისო განვითარების ასოციაცია (International Development Association - IDA); საერთაშორისო საფინანსო კორპორაცია (International Finance Corporation - IFC); მრავალმხრივი ინვესტიციების გარანტიის სააგენტო (Multilateral Investment Guarantee Agency - MIGA); ინვესტიციების სფეროში დავების მოსაგვარებელი საერთაშორისო ცენტრი (International Center for Settlement of International Disputes - ICSID).