"ნაციონალური მოძრაობა" - აზოტის ქარხანაში შექმნილი პრობლემები ხელისუფლების უნიათობას უკავშირდება

"ერთიანი ნაციონალური მოძრაობის" განცხადებით, აზოტის ქარხანაში შექმნილი პრობლემები ხელისუფლების უნიათობას უკავშირდება.

მიხეილ მაჭავარიანმა და დავით კირკიტაძემ, რუსთავის აზოტის ქარხანაში მიმდინარე პრობლემებზე დღეს გამართულ ბრიფინგზე ისაუბრეს, რომლის გამოც დაწესებულება უკვე მეორე თვეა არ მუშაობს, აქ დასაქმებული 2 400 ადამიანი კი შვებულებაში ჰყავთ გაშვებული.

"რუსთავის აზოტის საწარმო, რომელიც ქართული ეკონომიკის ფლაგმანია და სადაც 2 400 ადამიანია დასაქმებული, დახურვის საშიშროების წინაშე დგას. მიზეზი კი კვლავ მთავრობის უნიათობაა - ისინი "სოკართან" ხელშეკრულების დადებას დროში წელავენ. კომპანია კი, ამ დროს, მზადაა რუსთავის აზოტს მისაღებ ფასად მიაწოდოს ბუნებრივი აირი. მიზეზი, რატომ არ აწერს მთავრობა ხელშეკრულებას ხელს, სრულიად გაუგებარია. ამასობაში კი ქარხანა ერთ თვეზე მეტია გაჩერებულია, თანამშრომლები შვებულებაში ჰყავთ გაშვებული. შესაბამისად, იმ ხელფასის ნახევარს იღებენ, რომელიც ისედაც მცირეა. თუ ხელშეკრულებას ხელი დროულად არ მოეწერა, ქარხანა დაიხურება, ადამიანები კი უმუშევრები დარჩებიან", - განაცხადა დავით კირკიტაძემ და მთავრობას მოუწოდა, დროულად გააფორმოს ხელშეკრულება.

მისივე თქმით, ხელისუფლებამ დროულად უნდა გაატაროს ყველა ზომა, რათა ქარხანა არ დაიხუროს.

"მინდა ქართულმა საზოგადოებამ და რუსთავის აზოტის თანამშრომლებმა იცოდნენ, "ერთიანი ნაციონალური მოძრაობა" არ მივატოვებთ მათ ბედის ანაბარად, განსხვავებით მთავრობის წარმომადგენლებისგან, რომლებიც არ დაინტერესებულან ამ პრობლემით", - აღნიშნა კირკიტაძემ.

დეპუტატ მიხეილ მაჭავარიანის განცხადებით, აზოტის ქარხნის გაჩერება მთავრობასა და "გაზპრომს" შორის მოლაპარაკებებს უკავშირდება.

"ეს საკითხი მთავრობისა და "გაზპრომის" მოლაპარაკებებს უკავშირდება, რადგან, როდესაც "სოკარის" პრეზიდენტი საქართველოში იყო ჩამოსული, მათ ქარხნისთვის შესათავაზებელ ახალ ფასზე ისაუბრეს, თუმცა მოლაპარაკება კონკრეტული შედეგით არ დასრულებულა. ახლა მთავრობა აზოტის თანამშრომლებს ეუბნება, თითქოს "ნაციონალური მოძრაობა" ლობირებს "სოკარს", რის გამოც მათ საშუალება არ აქვთ "გაზპრომთან" "კარგი" ხელშეკრულება გააფორმონ. ჩვენი ინფორმაციით, "სოკარი" მზად იყო შეემცირებინა ფასი, ეს დევს მთავრობაში, უბრალოდ, მთავრობა ელოდება რაღაცას და ამ დროის განმავლობაში ტყუილს იძახის. ჩვენთვის ცნობილია, რომ დღეს ჩამოვა "სოკარის" დელეგაცია და ის მზად იქნება შესთავაზოს აზოტს ფასი. ამიტომ გვინდა რუსთავის საზოგადოებამ იცოდეს, რომ ორი თვით აზოტის გაჩერება მთავრობის უნიათობას უკავშირდება", - განაცხადა მიხეილ მაჭავარიანმა.