"მაესტრო" ლოგოს გარეშე მაუწყებლობს
შპს "სტუდია მაესტრო" ლოგოს გარეშე მაუწყებლობს. როგორც "მაესტროს" გენერალური დირექტორის, ლევან გაჩეჩილაძის ადვოკატმა, ირაკლი კორძახიამ განაცხადა, ლოგოს გარეშე მაუწყებლობის დავალება არხის ტექნიკურ ჯგუფს ბაჩო კიკაბიძემ მისცა.
ადვოკატის განმარტებით, აღნიშნულს გაჩეჩილაძე საბოტაჟად აფასებს.
"ბაჩო კიკაბიძემ გუშინ საღამოს ტექნიკურ ჯგუფს მისცა დავალება, რომ "მაესტრომ" ლოგოს გარეშე გააგრძელოს მაუწყებლობა. ლევან გაჩეჩილაძე მიიჩნევს, რომ უკანონო საბოტაჟს აქვს ადგილი, ამ უკანონო მოქმედებაზე კი პასუხისმგებლობა "მ ინვესტმენტს" და ბაჩო კიკაბიძეს ეკისრება", - განაცხადა კორძახიამ.
მისივე განმარტებით, ტელეკომპანიის ლოგოს და წარწერის გარეშე მაუწყებლობამ შესაძლოა არხს სერიოზული ფინანსური ზიანი მოუტანოს.
"ამან შეიძლება "მაესტროს" სერიოზული ზარალი მოუტანოს, რადგან "იმედთან" ხელშეკრულებაში პირდაპირ წერია, რომ ტელეკომპანიამ აუცილებელია ლოგოთი იმაუწყებლოს", - აღნიშნა კორძახიამ.