ქრთამის აღების ფაქტზე კახეთის სატყეო სამსახურის თანამშრომლები დააკავეს

საქართველოს ფინანსთა სამინისტროს საგამოძიებო სამსახურმა, ქრთამის აღების ფაქტზე გარემოსა და ბუნებრივი რესურსების დაცვის სამინისტროს "ეროვნული სატყეო სააგენტოს" კახეთის რეგიონალური სამსახურის თანამშრომლები, ხვთისო ქისტაური და სერგო პაპუნაშვილი დააკავა.

როგორც საგამოძიებო სამსახურში აცხადებენ, გამოძიების მიერ დადგენილია, რომ ბრალდებულებმა, 2016 წლის მარტის თვეში, მათ დაქვემდებარებაში არსებულ ტყის ტერიტორიაზე, რვა კუბური მეტრის ოდენობით ხე-ტყის უკანონოდ მოჭრის ნებართვის სანაცვლოდ, მოქალაქეს ქრთამის სახით მოსთხოვეს და გამოართვეს გარკვეული თანხა.

საქმეზე მიმდინარეობს გამოძიება საქართველოს სისხლის სამართლის კოდექსის 338-ე მუხლით, რაც ითვალისწინებს თავისუფლების აღკვეთას 6-დან 9-წლამდე ვადით.