აჭარის სტენდი ბელორუსის გამოფენაზე Leisure 2016 განსხვავებული პროგრამით წარდგა

აჭარის სტენდი ბელორუსის საერთაშორისო ტურისტულ გამოფენაზე Leisure 2016 განსხვავებული პროგრამით წარდგა და გამოფენის სტუმრების დიდი მოწონება დაიმსახურა.

როგორც აჭარის ავტონომიურ რესპუბლიკაში აცხადებენ, ქართულ ტრადიციულ სტილში მოწყობილ საგამოფენო სტენდთან ვიზიტორებს საშუალება ჰქონდათ ქართული ხალხური სიმღერები მოესმინათ და ტრადიციული კერძები დაეგემოვნებინათ, ასევე მონაწილეობა მიეღოთ აჭარული ხაჭაპურის დამზადების კულინარიულ მასტერკლასში. გამოფენის მსვლელობისას განსაკუთრებულ ყურადღებას ხელვაჩაურის ფოლკლორული ანსამბლ „ათძალის“ მიერ შესრულებული ქართული ფოლკლორი იპყრობდა.

„მიმდინარე წელს აჭარის სტენდი მინსკის ტურისტულ გამოფენაზე განსაკუთრებულ ყურადღებას იმსახურებს, რაც ჩვენს მიერ გამოფენაზე წარმოდგენილი არამატერიალური კულტურის - ფოლკლორის, სამზარეულოსა და ღვინის დამსახურებაა. ჩვენი არამატერიალური კულტურა არის ის, რაც ყველაზე მეტად მოწონთ ჩვენს ვიზიტორებს და ვაპირებთ რეგიონის კულტურულ პოტენციალს პოპულარიზაცია ჩვენს სამიზნე ქვეყნებში მსგავსი გამოფენებითა და აჭარის დღეების გამართვით გავუწიოთ“, - განაცხადა აჭარის ტურიზმისა და კურორტების დეპარტამენტის თავმჯდომარე მამუკა ბერძენიშვილმა.

აჭარის ტურიზმისა და კურორტების დეპარტამენტთან ერთად გამოფენაზე რეგიონს პოპულარიზაციას ტურისტული კომპანიები „აჭარა ტური“ და „ქეფითალ ჯორჯია თრეველი“ უწევენ.

ბელორუსი აჭარის ტურიზმისა და კურორტების დეპარტამენტისთვის უმნიშვნელოვანეს ტურისტულ ბაზარს წარმოადგენს, სადაც ტურისტების მოზიდვის მიზნით პიარ და მარკეტინგული ღონისძიებები მეოთხე წელია ხორციელდება. 2016 წლის სეზონისთვის აჭარის ტურიზმისა და კურორტების დეპარტამენტმა უკვე დაწყო პიარ-აქტივობები ბელორუსში, რაც როგორც გარე და ონლაინ რეკლამას, ასევე პრესის და ინფო ტურების ორგანიზებას, მინსკში „აჭარის დღეების“ ჩატარებასა და აჭარის შესახებ სპეციალური გადაცემების მომზადებას ითვალისწინებს.