”ნაციონალური მოძრაობა” Check in Georgia-ს კორუფციულ სქემას ასაჯაროებს

„ერთიანი ნაციონალური მოძრაობის“ დეპუტატი გიორგი კანდელაკი “კულტურის სამინისტროში კორუფციულ ფაქტებზე” საუბრობს.

„გვსურს საზოგადოების ყურამდე მივიტანოთ საქართველოს მთავრობის უმაღლეს ეშელონებში, კერძოდ, კულტურის სამინისტროში მიმდინარე კორუფციული ფაქტების შესახებ. სამწუხაროდ, კულტურის მინისტრმა მიხეილ გიორგაძემ თავი საზოგადოებას არა მხოლოდ მსოფლიოში უძველესი ოქროს მაღაროს, საყდრისის კორუფციული გარიგების გზით აფეთქებით დაამახსოვრა. კულტურის მინისტრად დანიშვნასთან ერთად ბატონ გიორგაძეს, რომელიც ფირმა „ისთერნ ფრომოუშენის“ ერთ-ერთი დამფუძნებელია, გაუჩნდა ინტერესთა კონფლიქტი. ეს ფირმა ადრეც ერთ-ერთი წამყვანი იყო, მაგრამ მის გამინისტრებასთან ერთად ფაქტია, რომ ამ ფირმას და მასთან აფილირებულ ადამიანებს სახელმწიფო დაფინანსება რეალურად გაეზარდათ. პროექტ Check in Georgia-ს ხელმძღვანელი არის სამინისტროს სიპების ხელმძღვანელი დავით მენაბდე, რომელიც ამავე დროს „ისთერნ ფრომოუშენის“ დამფუძნებელიცაა. მისი სიძე ირაკლი შენგელია კომპანია „ვიზარდ ივენთის“ დამფუძნებელია, რომელიც თბილისის დიდ საკონცერტო დარბაზს მართავს. მისივე მეჯვარე და „ვიზარდ ჯორჯიას“ მენეჯერი ვაჟა ხაჩიძე კი კომპანია „თიქეთ ჯორჯიას“ დამფუძნებელია, რომელიც ყველა ამ კონცერტზე ბილეთებსაც გაყიდის და მნიშვნელოვან ფინანსურ სარგებელს მიიღებს”, - განაცხადა კანდელაკმა.

მისივე თქმით, საზოგადოებას ახსოვს რომ წინა წლებში მსგავსი ღონისძიებებისთვის გაწეულ ხარჯს ”ქართული ოცნების” მთავრობა არამიზნობრივად აცხადებდა.

”თუმცა 2012 წელს ტურიზმი გაიზარდა 40%-ით, მაშინ როცა ”ქართული ოცნების” მმართველობის პირველ წლებში ტურიზმის ზრდაში რეალური სტაგნაცია გვაქვს. პრობლემაა არა კულტურული ღონისძიებების გამართვა, არამედ მათზე სახელმწიფო სახსრების ხარჯვა გაუმჭვირვალე კორუფციული სქემებით, რომელთა გამოყენებითაც ხეირობენ ამ ღონისძიებებზე პასუხისმგებელი სახელმწიფო მოხეელები. მოგეხსენებათ მთავრობის სარეზერვო ფონდიდან წინასაარჩევნოდ კონცერტების სერიის გასამართად, მათ შორის ოთხი ცნობილი არტისტის ჩამოსაყვანად გამოიყო 29 მილიონი ლარი. დოკუმენტების შესწავლით ირკვევა, რომ იმ ოთხი არტისტის საბაზრო ღირებულება რომელთა საქართველოში ჩამოყვანა კამპანია Check in Georgia-ს ფარგლებშია დაგეგმილი რეალურად 10 მილიონ ლარს არ სცდება (რობინ უილიამსი, ეროს რამაზოტი, ხოსე კარერასი და Maroon 5). კულტურის სამინისტროს მიერ შარშან გაწეული მსგავსი ხარჯების გამოცდილება გვაფიქრებინებს, რომ წელსაც ამ პროგრამის ადმინისტრირებისთვის კომპანიების შერჩევა მოხდება გაუმჭვირვალე, ხშირად კი კორუფციული გზით”, - განაცხადა კანდელაკმა.