გერმანიამ დღეს ჩარტერული რეისით საქართველოს 21 მოქალაქის რეადმისია განახორციელა
დღეს გერმანიამ ჩარტერული რეისით საქართველოს 21 მოქალაქის საქართველოში რეადმისია განახორციელა , - ამასთან დაკავშირებით საქართველოს შინაგან საქმეთა სამინისტრომ საქართველოს შინაგან საქმეთა მინისტრისა და გერმანიის ფედერალური შინაგან საქმეთა მინისტრის ერთობლივი განცხადება გაავრცელა.
ერთობლივ განცხადებაში ნათქვამია, რომ რეადმისიაში მონაწილეობა მიიღო ოთხმა ფედერალურმა მიწამ: ჩრდილოეთ რაინ-ვესტფალიამ, ბადენ-ვიურთემბერგმა, რაინლანდ-პფალცმა და ბავარიამ.
როგორც განცხადებაშია აღნიშნული, ავიარეისის დაგეგმვა და კოორდინაცია საქართველოს შინაგან საქმეთა სამინისტროს, გერმანიის ფედერალური პოლიციისა და ევროპის საზღვრის დაცვის სააგენტო „ფრონტექსის“ ერთობლივი ძალისხმევით მოხდა.
გერმანიაში მცხოვრები საქართველოს 22 592 მოქალაქიდან, 2016 წლის 29 თებერვლის მონაცემებით, ქვეყნის დატოვების ვალდებულების მქონე იყო 2 240 პირი. გერმანიამ 2015 წელს თითქმის 300 ქართველის, ხოლო 2016 წლის იანვარ-თებერვალში, დაახლოებით, 50 ქართველის რეადმისია განახორციელა.
როგორც გერმანიის ფედერალურმა შინაგან საქმეთა მინისტრმა, დოქტორ თომას დე მეზიემ განაცხადა, დღევანდელი ღონისძიება ცალსახა გზავნილი უნდა იყოს: მათ, ვინც მათთან დაცვას არ საჭიროებენ, პროცესის დასრულების შემდგომ, გერმანია სწრაფად უნდა დატოვონ.
”თუ ეს ნებაყოფლობით არ მოხდება, აღსრულდება გაძევების გზით. ეს არის იმ პირთა ინტერესში, ვინც ნამდვილად საჭიროებს დაცვას და, აგრეთვე, მათივე ქვეყნების ინტერესში. მე და ჩემი ქართველი კოლეგა შევთანხმდით, რომ გავაგრძელებთ საქართველოში იმ პირების რეადმისიას, რომლებიც დაცვას არ საჭიროებენ“, - განაცხადა გერმანიის შინაგან საქმეთა მინისტრმა.
საქართველოს შინაგან საქმეთა მინისტრმა, გიორგი მღებრიშვილმა აღნიშნულთან დაკავშირებით განაცხადა, რომ საქართველო-ევროკავშირის თანამშრომლობის ერთ-ერთი მნიშვნელოვანი სფერო რეადმისიის შეთანხმების ეფექტური შესრულებაა. ”ევროკავშირის წევრი ქვეყნების განაცხადების 93%-ზე მეტი საქართველოს მხრიდან კმაყოფილდება, ხოლო გერმანიასთან - თითქმის 100% -იანი მაჩვენებელი გვაქვს.
დარწმუნებული ვარ, ჩვენს უწყებებს შორის თანამშრომლობა არალეგალურ მიგრაციასთან ბრძოლის კუთხით კიდევ უფრო ეფექტიანი გახდება.
ამ შემთხვევაში, საუბარია საქართველოს იმ მოქალაქეებზე, რომლებიც ევროკავშირში არსებულ „თავშესაფრის“ მაძიებელთა საკითხის განხილვის გახანგრძლივებულ პროცედურებს იყენებენ, როგორც შესაძლებლობას, დარჩნენ ქვეყანაში და მოცემული დრო არაკეთილსინდისიერი მიზნებისთვის გამოიყენონ.
საქართველოს საპოლიციო თანამშრომლობა ევროკავშირის ქვეყნებთან უფრო ფართოვდება და ღრმავდება, რაც კრიმინალის წინააღმდეგ ჩვენს ერთობლივ ბრძოლას კიდევ უფრო შედეგიანს ხდის. ჩვენს სახელმწიფოებს ყველა ბერკეტი აქვთ იმისთვის, რომ ეფექტურად დავუპირისპირდეთ დანაშაულს და ისეთ გლობალურ გამოწვევას, როგორიცაა არალეგალური მიგრაცია“,- განაცხადა გიორიგ მღებრიშვილმა.
გერმანიიდან სხვადასხვა სახელმწიფოს მიმართულებით, განსაკუთრებით, დასავლეთ-ბალკანეთის ქვეყნებში, ამჟამად კვირაში ორი-სამი ჩარტერული რეისი სრულდება. გასულ წელს გერმანიამ ჯამში 20888 სხვადასხვა ქვეყნის მოქალაქის დეპორტი განახორციელა, მათგან - 19712 საჰაერო გზით. წინა წელთან შედარებით, 2015 წელს ეს რიცხვი გაორმაგდა. ფედერალური პოლიციის ინფორმაციით, წელს, თებერვლის თვის ბოლოს ჩათვლით, 4316 უცხოელი საკუთარ სამშობლოში იქნა რეადმისირებული.