მთავრობის ადმინისტრაციაში ეკონომიკური ზრდის ხელშეწყობის რეფორმებზე იმსჯელეს

მთავრობის ადმინისტრაციაში ეკონომიკური ზრდის ხელშეწყობის მიზნით დაგეგმილ რეფორმებზე იმსჯელეს, - ამის შესახებ მთავრობის ადმინისტრაციაში აცხადებენ.

მათივე ინფორმაციით, დღეს მთავრობის ადმინისტრაციაში გამართულ ეკონომიკური ზრდის თემატური საკოორდინაციო ჯგუფის შეხვედრაზე განიხილეს თემები: ბიზნეს და საინვესტიციო გარემოს რეფორმები, ფინანსებზე წვდომის, მცირე და საშუალო ბიზნესის განვითარების ხელშეწყობა, ინოვაციები და ტექნოლოგიები, ტურიზმისა და ინფრასტუქტურის განვითარება და სატრანზიტო პოტენციალის მაქსიმალური გამოყენება.

მთავრობის ადმინისტრაციის ცნობით, პირველ თემატურ შეხვედრას, რომელიც ეკონომიკურ ზრდას ეძღვნებოდა, ეკონომიკისა და მდგრადი განვითარების მინისტრის მოადგილე ირმა ქავთარაძე და ევროკავშირის წარმომადგენლობის პროექტების უფროსი კაიდო სირელი უძღვებოდნენ.

„საქართველოს მთავრობას აქვს რეფორმების ინტენსიური დღის წესრიგი, რომელთა განხორციელება უახლოეს მომავალში იგეგმება. ჩვენ ინფორმაციას ვაწვდით დონორებს და იმედი გვაქვს, მათთან თანამშრომლობით, ჩვენი ეკონომიკური რეფორმები კიდევ უფრო გამყარდება და განვაგრძობთ იმ წარმატებების მიღწევას, რომელსაც ბოლო წლების განმავლობაში საკმაოდ კარგად ვახორციელებთ“, - განაცხადა ირმა ქავთარაძემ.

ადმინისტრაციის ინფორმაციით, საქართველოს მთავრობის ადმინისტრაციის დონორთა კოორდინაციის სამსახურში ეკონომიკური ზრდის თემატური საკოორდინაციო ჯგუფის არსებობას მიესალმება ევროკავშირის წარმომადგენლობის პროექტების უფროსი კაიდო სირელი. მისი თქმით, ევროკავშირი საქართველოსთან თანამშრომლობს ევროპის სამეზობლო პოლიტიკისა და ასოცირების შესახებ შეთანხმების ფარგლებში.

„ეკონომიკური ზრდის თემა ევროკავშირისთვის ძალიან მნიშვნელოვანია. ჩვენ საქართველოს მხარდაჭერას მომავალშიც განვაგრძობთ“, - განაცხადა კაიდო სირელიმ.

როგორც მთავრობის ადმინისტრაციაში აცხადებენ, საქართველოს მთავრობა, მიმდინარე რეფორმებისა და განვითარების საჭიროებების შესახებ დონორი ქვეყნებისა და ორგანიზაციებისთვის ინფორმაციის თანმიმდევრულად მიწოდების, ასევე, სახელმწიფო უწყებების ინიციატივების რეალიზებისა და საგარეო დახმარების რესურსების მობილიზების ხელშეწყობის მიზნით, თემატური საკოორდინაციო ჯგუფების შეხვედრებს რეგულარულად აწყობს. შეხვედრები ყოველწლიური საკოორდინაციო ფორუმის გაგრძელებას წარმოადგენს, რომელიც პრემიერ-მინისტრ გიორგი კვირიკაშვილის ხელმძღვანელობით გაიმართა.