”დელტა” კახეთში სეტყვის საწინააღმდეგოდ განხორციელებული სამუშაოების შესახებ ინფორმაციას ავრცელებს
სსიპ სახელმწიფო სამხედრო სამეცნიერო ტექნიკური ცენტრი ”დელტა” 28-29 მაისს კახეთის რეგიონში სეტყვის საწინააღმდეგო სამუშაოების შესახებ ინფორმაციას ავრცელებს.
როგორც სსსტც „დელტაში“ აცხადებენ, „დელტას“ სეტყვის საწინააღმდეგო სისტემის მართვის ცენტრის მიერ 28 მაისის დილის საათებიდან კახეთის რეგიონში დასავლეთ მიმართულებიდან შემომავალი მასშტაბური ღრუბლის მასები დაფიქსირდა.
მათივე ინფორმაციით, 27-28 მაისს, გორისა და დუშეთის რაიონებში მოსული სეტყვის შემდეგ ადგილზე არსებული ნალექის მასები გაძლიერდა და გადაადგილდა აღმოსავლეთით, კახეთის რეგიონის მიმართულებით.
”28 მაისს მთელი დღის განმავლობაში კახეთის რეგიონში მოხდა 6 სეტყვასაშიში ღრუბლის ფრონტის შემოსვლა, რომლებიც 97 ერთეული ქართული წარმოების სეტყვასაწინააღმდეგო რაკეტით დამუშავდა, აქტიური ზემოქმედების შედეგად განეიტრალდა და წვიმის სახით ჩამოიცალა 1800 კვ.კმ ფართობის მქონე სეტყვასაშიში ღრუბელი. 28 მაისს მიმდინარე ატმოსფერული პროცესები გაგრძელდა 29 მაისსაც, მთელი დღის განმავლობაში რეგიონში შემოვიდა 12 სეტყვასაშიში ღრუბლის ფრონტი, რომელიც დამუშავდა 35 ერთეული რაკეტით, ამან 4470 კვ.კმ ფართობის ღრუბლის ფრონტი გაანეიტრალა. რაკეტებით აქტიური ზემოქმედების შედეგად სეტყვასაშიში ღრუბლების უდიდესი ნაწილი ადგილზე ჩამოიცალა წვიმის სახით”, - აცხადებენ ”დელტაში”.
მათივე ინფორმაციით, აღსანიშნავია რომ 28-29 მაისს დამუშავების პროცესი მთლიანად „დელტას“ მიერ წარმოებული ქართული სეტყვასაწინააღმდეგო რაკეტებით განხორციელდა, რომლის წარმოებაც „დელტამ“ რამდენიმე კვირის წინ დაიწყო.