ირაკლი როსტომაშვილი - "ცენტრ პოინტის" მიერ არჩეულმა სტრატეგიამ არ გაამართლა

„ცენტრ პოინტის“ საქმე რამდენიმე დღის წინ კვლავ საყოველთაო ყურადღების ცენტრში მოექცა

-  საქართველოს მთავარმა პროკურატურამ კომპანიის ერთ-ერთი დამფუძნებლის, მაია რჩეულიშვილის მიმართ სისხლის სამართლებრივი დევნა დაიწყო. დაკავებულია ორი თანამშრომელი – გაყიდვების მენეჯერი სალომე ჩარკვიანი და „ცენტრ პოინტ აჭარის“ დირექტორი ირაკლი მინდელი. დაკითხვაზე იყო დაბარებული გუკა რჩეულიშვილი, რომელიც პროკურატურამ სისხლის სამართლებრივ პასუხისგებაში დაუსწრებლად მისცა. კომპანია „ცენტრ-პოინტის“ დამფუძნებლები მიიჩნევენ, რომ საქმე პოლიტიკურია, თუმცა ისიც ფაქტია, რომ კომპანიას უამრავი უკმაყოფილო კლიენტი და შეუსრულებელი ვალდებულებები დაუგროვდა. პროკურატურა „ცენტრ პოინტს” აჭარაში მენაშენეთა კუთვნილი 20 მილიონ ლარზე მეტის გაფლანგვა-მითვისებას ედავება.

ზუსტად სამი წლის წინ, 2013 წლის ივლისში, პროკურატურამ „ცენტრ-პოინტის“ დამფუძნებლებს - მაია რჩეულიშვილს, რუსუდან კერვალიშვილს და მათ ყოფილ პარტნიორს, ივანე ცაგურიას თაღლითობის, მითვისების, გაფლანგვის მუხლებით ბრალი წაუყენა. მათ მენაშენეების 11 მილიონის გაფლანგვას აბრალებდნენ. მაშინ სასამართლოს გადაწყვეტილებით, რუსუდან კერვალიშვილსა და მაია რჩეულიშვილს 250 000-ლარიანი გირაოს გადახდა დაეკისრათ, ივანე ცაგურია კი, სასამართლო დარბაზიდან 100 000-ლარიანი გირაოს სანაცვლოდ გაათავისუფლეს.

„ბიზნესპრესნიუსი“ სამშენებლო სექტორის წარმომადგენელთა აზრით დაინტერესდა და მათ მხოლოდ ერთი შეკითხვა დაუსვა: როგორ უნდა შეძლოს ამ მდგომარეობაში ჩავარდნილმა კომპანიამ აღებული ვალდებულებების გასტუმრება და შექმნილი ვითარებიდან გამოსვლა?

სამშენებლო კომპანია „მონოლით ჯგუფის“ დამფუძნებელი და ხელმძღვანელი, ზვიად დარახველიძე მიიჩნევს, რომ ბიზნესში ორი რამ არის მთავარი - პატიოსნება და სწორი გათვლები. ამის გარეშე პრობლემები გარდაუვალია.

"კომპანიამ თავისი შესაძლებლობები უნდა გათვალოს და არასწორი ნაბიჯები არ უნდა გადადგას. რაც ყველაზე მთავარია - შენი შემოსავალი კარგად უნდა იცოდე და სხვისი ფულით არ უნდა მოინდომო ცხოვრების აწყობა. თავის დროზე რამდენიმე კომპანიამ დაიპყრო ეს ბაზარი, ისინი პრაქტიკულად მონოპოლისტები გახდნენ და ბოლოს უკვე ასტრალში გავიდნენ. სახელმწიფომ მათ სოლიდური გადასახადები ჩამოაწერა, ჩვენ კი, კეთილსინდისიერ გადამხდელებს, არავინ არაფერს გვპატიობს", - აღნიშნა ზვიად დარახველიძემ.

კომპანიის ხელძღვანელის აზრით, „ცენტრ-პოინტი“ ვეღარ დაეწია აღებულ ვალდებულებებს და მათი გასტუმრების შანსი ხელიდან გაუსხლტა.

„მათ ხელიდან გაეპარათ ეს ვალდებულებები და ვეღარაფერი უშველეს. არ შეიძლება ვალად აიღო 100 მილიონი, როცა მხოლოდ ერთი მილიონის შექმნა შეგიძლია. ამ კომპანიას იმხელა დავალიანება ჰქონდა, რომ ვერანაირად გაისტუმრებდა და ვერც გაისტუმრა.“

"საქართველოს მენაშენეთა ასოციაციის ხელმძღვანელის“ ირაკლი როსტომაშვილის განცხადებით, ძალიან რთულია „ცენტრ-პოინტზე“ ლაპარაკი, რადგან ამ საქმეში პროკურატურა და ადვოკატები არიან ჩართული.

"ამიტომ, მე მხოლოდ ჩემს მოსაზრებას გამოვთქვამ: მათი მთავარი შეცდომა ის იყო, რომ მხოლოდ კლიენტებისაგან მოზიდული თანხით მუშაობდნენ. თუ სხვა კომპანიებს თანხის 60-70 პროცენტი ბანკებიდან ჰქონდათ მოზიდული, „ცენტრ-პოინტი“, ჩემი დაკვირვებით, მთლიანად მოსახლეობის ფულით მუშაობდა. სწორედ ამიტომ, ამ კომპანიას პრობლემა ბანკებთან კი არა, მოსახლეობასთან შეექმნა. შესაბამისად, თბილისში თუ იყო „გადაგდებული“ პირობითად, ათასი ოჯახი, ნახევარი „ცენტრ-პოინტზე“ მოდიოდა, დანარჩენი კი - სხვა კომპანიებზე. ჩემთვის ძნელია რაიმეს თქმა, მაგრამ ფაქტია, რომ მათ მიერ არჩეულმა სტრატეგიამ არ გაამართლა", - აღნიშნა ირაკლი როსტომაშვილმა.

დეველოპერული კომპანია „აი ჯი ეს ჯგუფის“ ფინანსური მენეჯერის, უძრავი ქონების ექსპერტის შოთა გუჯაბიძის აზრით, როდესაც წინასწარი გაყიდვის მეთოდით მუშაობ და საკუთარი რესურსი არ გაქვს, საქმე თითქმის ყოველთვის რთულდება.

"ასეთ დროს, პროექტი რომ დასრულდება, მშენებელი მთლიანად მის გაყიდვაზეა დამოკიდებული, ამიტომ ერთი ბინაც რომ არ გაიყიდოს და ჩავარდეს, ან ფორსმაჟორული სიტუაცია შეიქმნას, ან თუნდაც ბინების ფასი დაეცეს, ობიექტი ჩავარდება, არ გაიყიდება და კომპანიას ვალდებულებები დააწვება. დაზარალებული კლიენტურა, რა თქმა უნდა, სასამართლოს მიმართავს. როდესაც კომპანიის შემოსავალი აღებულ ვალდებულებებს ვეღარ სწვდება, ყოველთვის გადაულახავი პრობლემები გროვდება. გეთანხმებით, წინასწარი გაყიდვა მთელ მსოფლიოში მიღებული ხერხია, მაგრამ იქ წინასწარი გაყიდვა იმიტომ კი არ ხდება, რომ ეს თანხა მშენებლობას მოხმარდეს, არა - იქ მშენებლობა წინასწარ არის დაფინანსებული. უბრალოდ, კლიენტი ცდილობს ბინა დროულად შეიძინოს, რომ სხვამ არ დაასწროს და უბინაოდ არ დარჩეს.

ექსპერტის თქმით, ბანკებიდან თანხა რომ მოიზიდონ, სამშენებლო კომპანიები ხშირად თავიანთ ქონებას იპოთეკით ტვირთავენ, რაც ასევე რისკის შემცველია: სწორედ ამ გზით მოზიდული სახსრებით მიმდინარეობს მშენებლობები. მერე კი, კომპანია მშენებლობიდან ისტუმრებს ყველა ვალდებულებას. ამიტომ, ბანკებმა ჯერ კარგად უნდა შეისწავლონ, რამდენად გაამართლებს ეს პროექტი და რამდენად მიზანშეწონილია მისი დაფინანსება. წინააღმდეგ შემთხვევაში, იპოთეკით დატვირთულ ქონებას ბანკი წაიღებს, ხოლო ის, ვინც მშენებარე კორპუსში ბინა შეიძინა, ჰაერში რჩება. საკრედიტო რესურსზე წვდომა უმნიშვნელოვანესი პირობაა, მაგრამ ნებისმიერ მშენებლობას სჭირდება შემოწმება, მონიტორინგი, რომელიც დამოუკიდებელმა ფირმამ, ან უწყებამ უნდა განახორციელოს - ეს პრევენციის ყველაზე აპრობირებული და კარგი მეთოდია.

ქართულ ბაზარზე იყვნენ კომპანიები, რომლებსაც ბევრი ვალდებულება ჰქონდათ დაგროვილი, მაგრამ გაისტუმრეს - ეს უკვე სწორი მენეჯმენტის დამსახურებაა: სწორი დაგეგმვა, რესურსების, დანახარჯების და რისკების სწორად შეფასება - ეს პრობლემების დაძლევის ყველაზე საიმედო გზაა. ვფიქრობ, რომ მარკეტინგული თვალსაზრისით გამოუვალი მდგომარეობა არ არსებობს, მაგრამ წინასწარი, ზუსტი გათვლებიც აუცილებელია“, - აცხადებს შოთა გუჯაბიძე.

ხათუნა ჩიგოგიძე