„ავერსმა“ ინფექციური საავადმყოფოს ტერიტორიაზე სახელმწიფოს ალტერნატიული ნაგებობის აშენების საშუალება არ მისცა

ჯანდაცვის მინისტრი იმედოვნებს, რომ ინფექციური საავადმყოფოსთვის ახალი კლინიკის აშენებამდე პაციენტებს სერვისის მიღების საფრთხე არ შეექმნებათ.

„დიდი იმედი მაქვს, რომ ქონების მეპატრონესთან მოვახერხებთ მოლაპარაკებას, თუმცა ასეთ სტრატეგიულ ობიექტს ასე არ დავტოვებთ. უკვე გამოყოფილია მიწის ნაკვეთი თბილისში, დაწყებულია პროექტირებაზე მუშაობა და სავარაუდოდ, წლის ბოლოს უკვე სამშენებლო სამუშაოები დაიწყება“, - ასე გამოეხმაურა შრომის, ჯანმრთელობისა და სოციალური დაცვის მინისტრი დავით სერგეენკო ინფექციური საავადმყოფოს მედპერსონალის აქციას.

მინისტრის განცხადებით, კომპანია „ავერსმა“ ინფექციური საავადმყოფოს ტერიტორიაზე სახელმწიფოს ალტერნატიული ნაგებობის აშენების საშუალება არ მისცა.

„ბოლო წელიწადნახევარი დაიხარჯა პრაქტიკულად უშედეგოდ კომპანია „ავერსთან“, რომ მოეცათ საშუალება სახელმწიფოს იმავე თანხებით აეშენებინა იქვე, იმავე ტერიტორიაზე ალტერნატიული შენობა. წლის დასაწყისში შევიძინეთ სამედიცინო აღჭურვილობა, რომლის გარეშეც პაციენტების ხარისხიანი მოვლა შეუძლებელი იქნებოდა. ეს აღჭურვილობა მიწოდებული აქვს, თუმცა მეპატრონე არ აძლევს იმის საშუალებას, რომ ელემენტარული კოსმეტიკური რემონტი, კლინიკის ხარჯით ჩასატარებელი სამუშაოები შესრულდეს, მოწესრიგდეს პირობები და პაციენტებისთვის დამონტაჟდეს მარტივი სამედიცინო აპარატურა“, - განმარტა დავით სერგეენკომ.

ჯანდაცვის უწყების ხელმძღვანელმა იმედი გამოთქვა, რომ ახალი კლინიკის აშენებამდე, ქონების მეპატრონე მისცემს საშუალებას, პაციენტებს არ შეექმნათ სერვისების მიღების საფრთხე.

„იმედი მაქვს, რომ ქონების მეპატრონე წავა მარტივ დათმობაზე და მოგვცემს საშუალებას, რომ სანამ ახალი კლინიკა აშენდება, იქამდე პაციენტებს არ შეექმნათ საფრთხე ასეთი მნიშვნელოვანი დახმარების მიღებისთვის“, - აღნიშნა დავით სერგეენკომ.