თბილისში საქართველო-თურქეთის ბიზნეს-ფორუმი გაიმართება

სასტუმრო „თბილისი მერიოტში“ დღეს თბილისში საქართველო-თურქეთის ბიზნეს-ფორუმი გაიმართება.

როგორც  სავაჭრო-სამრეწველო პალატაში განაცხადეს, ღონისძიება თურქეთის სოფლის მეურნეობისა და სურსათის მინისტრის საქართველოში ვიზიტის ფარგლებში დაიგეგმა. ფორუმი სავაჭრო-სამრეწველო პალატის პრეზიდენტის, ნინო ჩიქოვანისა და საქართველოს პრემიერ-მინისტრ გიორგი კვირიკაშვილის მისასალმებელი სიტყვებით გაიხსნება. ასევე ბიზნეს სექტორს სიტყვით საქართველოსა და თურქეთის სოფლის მეურნეობის მინისტრები: ოთარ დანელია და ფარუკ ჩელიკი მიმართავენ. ღონისძიებას საქართველოს ეკონომიკისა და მდგრადი განვითარების მინისტრი დაესწრება.

მისასალმებელი განცხადებების შემდეგ ღონისძიება სოფლის მეურნეობის სექტორის ზოგადი მიმოხილვით გაგრძელდება. პრეზენტაციების ფორმატში მხარეები ერთმანეთს სოფლის მეურნეობის სფეროში დაგროვილ გამოცდილებას გაუზიარებენ. საქართველოს სოფლის მეურნეობის სამინისტრო კოლეგებს ამ კუთხით დაგეგმილ და მიმდინარე რეფორმებს გააცნობს. შეჯამებისთვის კი საქართველოს სავაჭრო-სამრეწველო პალატის საერთაშორისო ურთიერთობების სამსახურის უფროსი გიორგი ვეკუა შეკრებილი ბიზნეს-სექტორისთვის ქვეყნის ეკონომიკის ზოგად მიმოხილვას წარადგენს. პრეზენტაციების შემდეგ დაგეგმილია ორმხრივი შეხვედრები ბიზნესისთვის. ღონისძიებას 120-მდე ქართული და თურქული კომპანიის წარმომადგენლები დაესწრებიან.

ფორუმში მონაწილეობის მისაღებად საქართველოში თურქული კომპანიების 43 წარმომადგენელი ჩამოვიდა. მათ შორის რძის მწარმოებელი კომპანიები, ასევე მარცვლეულის, თევზის, კვერცხის, სასმელის, ხორცის, ცხოველური საკვების, სასოფლო-სამეურნეო ტექნიკის მწარმოებლები და მეფრინველეები არიან. ღონისძიებაში მონაწილეობას ასევე საქართველოს ბაზარზე მომუშავე 40-მდე თურქული კომპანიაც მიიღებს. დარეგისტრირებულია 25 ქართული კომპანია, რომელთა საქმიანობის ძირითადი სფეროებიც თევზის, რძის, ჩირის, ჩაის, ღვინისა და ხილის წარმოებას, ასევე დისტრიბუციას წარმოადგენს.

ვიზიტის ფარგლებში თურქეთის დელეგაცია საქართველოს პრემიერ-მინისტრს შეხვდება. ასევე დაგეგმილია შეხვედრები სოფლის მეურნეობის სამინისტროში, ღვინისა და სურსათის ეროვნულ სააგენტოებში. ასევე თურქეთის დელეგაციის წევრები სამეცნიერო კვლევით ცენტრსაც მოინახულებენ.