აჭარას ახალი ტურისტული ადგილი ღვინის სახლი შეემატა
აჭარას ახალი ტურისტული ადგილი - აგროსერვის ცენტრის ღვინის სახლი შეემატა.
როგორც აჭარის ტურიზმისა და კურორტების დეპარტამენტში განაცხადეს, ობიექტზე, რომელიც ქობულეთში ქალაქიდან 10 წუთის სავალზე მდებარეობს, სტუმრებს საშუალება აქვთ გაეცნონ, ადგილზე დააგემოვნონ და შეიძინონ საქართველოში წარმოებული სხვადასხვა სახის ღვინო. ღვინის სახლის სერვისებში შედის ტური ღვინის სახლის გვერდით მდებარე ხეხილისა და ვაზის სანერგე მეურნეობაში, ასევე ღვინის დაყენების ტექნოლოგიების გაცნობა, ღვინის დეგუსტაცია და შეძენა.
მათივე ინფორმაციით, ღვინის სახლის სერვისების გაცნობისა და პოპულარიზაციის მიზნით ტურისტული პროდუქტების განვითარების სააგენტოსა და აგროსერვის ცენტრის ორგანიზებით ტურისტული სააგენტოებისა და სასტუმროების წარმომადგენლებისთვის ტურისტულ ობიექტზე ინფოტური მოეწყო. შეხვედრისას ტუროპერატორებს ღვინის სახლის ხელმძღვანელობამ ორმხრივი თანამშრომლობის პირობებისა და რეგიონში აგროტურიზმის განვითარების მნიშვნელობაზე ესაუბრა.
”ღვინის სახლში ტურისტებისთვის მრავალფეროვანი, საინტერესო და მიმზიდველი ინტერიერის შექმნის თვალსაზრისით ღვინისა და მასთან დაკავშირებული რეწვის ნიმუშების საგამოფენო დარბაზი, ენოთეკა და ეთნოგრაფიული კუთხეა განთავსებული. იქვე მოწყობილ სამუზეუმო კუთხეში ხიხანის ციხეზე აღმოჩენილი არქეოლოგიური მასალისა და ნივთების გაცნობა-დათვალიერებაა შესაძლებელი. სახლის საგამოფენო სივრცეში კი ღვინოსთან ერთად სტუმრებს საქართველოში წარმოებული პროდუქტების და სუვენირების დათვალიერება-შეძენა შეუძლიათ. ობიექტზე სამომავლოდ სხვადასხვა სახლის ფესტივალების გამართვა იგეგმება, რომელიც სტიმულირებას მისცემს აგროსასურსათო პროდუქციის მწარმოებლებს”, - ნათქვამია ინფორმაციაში.