დღეს პროგრამა „სტარტაპ საქართველოს“ მაღალტექნოლოგიური ბიზნეს იდეების ფინალისტთა პრეზენტაციები გაიმართება.
როგორც ეკონომიკისა და მდგრადი განვითარების სამინისტროში განაცხადეს, პრეზენტაციებს „სილიკონ ველის“ ვენჩურული ინვესტორები შეაფასებენ.
”პროგრამის მაღალტექნოლოგიური კომპონენტის ფარგლებში 150-მდე განაცხადი შემოვიდა, მათ შორის 51 ფინალისტია. ფინალისტების შერჩევის მთავარი კრიტერიუმია ისეთი პროექტების შერჩევა, რომლებიც კონკურენტუნარიანები იქნებიან გლობალური მასშტაბით და ექნებათ ზრდის შესაძლებლობა.
შემოსულ განაცხადებს 3 კვირის განმავლობაში საერთაშორისო ექსპერტები აფასებდნენ ,,სილიკონის ველიდან”. შეფასების მთავარი კრიტერიუმები იყო: ინოვაციურობის ხარისხი, გლობალურ ბაზარზე გასვლის პოტენციალი, ვენჩურული ინვესტიციებისთვის მიმზიდველი პროდუქტები, გუნდის კომპეტენტურობა და ა.შ.”, - აცხადებენ სამინისტროს პრესსამსახურში.
მათივე ცნობით, ჯამში პროექტ ,,სტარტაპ საქართველოს" ფარგლებში 720-ზე მეტი განაცხადი შემოვიდა ინოვაციური ბიზნესის წარმოებისთვის.