საქართველოში წებოვანი სამშენებლო მასალების საწარმო გაიხსნება. ”ჰენკელი” ახალ საწარმოს გარდაბნის რაიონის სოფელ მარტყოფში 14 სექტემბერს გახსნის.
საქართველოს ეროვნული საინვესტიციო სააგენტოს ცნობით, ეს ”ჰენკელის” პირველი საწარმოა საქართველოში. ქარხანაში Ceresit-ის სამშენებლო წებოვანი მასალები დამზადდება.
”ჰენკელში” წარმოებული პროდუქცია ადგილობრივ ბაზარზე გაიყიდება. რაც შეეხება ექსპორტს, საწარმო წებოვან სამშენებლო მასალებს სომხეთსა და აზერბაიჯანში გაიტანს.
ახალ საწარმოში 35 ადგილობრივი დასაქმდება. კომპანიამ საქართველოში 8 მილიონ დოლარიანი ინვესტიცია განახორციელა. ”ჰენკელის” საწარმოს მშენებლობა 2015 წლის ნოემბერში დაიწყო.
”ჰენკელი” 1876 წელს გერმანიაში დაარსდა. კომპანია მსოფლიო მასშტაბით საქმიანობს და ცნობილია ტექნოლოგიებით ბიზნესის სამ სფეროში: სარეცხისა და სახლის მოვლის საშუალებები, სილამაზისა და მოვლის საშუალებები და წებოვანი ტექნოლოგიები. ”ჰენკელს” 50 000 ადამიანი ჰყავს დასაქმებული. კომპანიის გაყიდვებმა 2014 წელს 16,4 მილიარდი ევრო შეადგინა.