”რთველი 2016-ის” ფარგლებში სახელმწიფო სუბსიდიის გაცემის პროცესი დაიწყო
15 სექტემბრის 12:00 საათის მონაცემებით, კახეთის რეგიონში 24,5 ათასამდე ტონა ყურძენია გადამუშავებული, - ამის შესახებ სოფლის მეურნეობის სამინისტროში განაცხადეს.
მათივე ინფორმაციით, აქედან 9,9 ათასი ტონა “რქაწითელი”, 11,8 ათასი ტონა “საფერავი”, 1,2 ათასი ტონა “კახური მწვანე”, დანარჩენი კი სხვადასხვა ჯიშის ყურძენია. განვლილ დღე-ღამეში კვლავ დაფიქსირდა ყურძნის გადამუშავების დღეღამური მაჩვენებლის ზრდა, რომელმაც 3052 ტონას მიაღწია.
სამინისტროს ცნობით, ღვინის კომპანიებში ყურძნის რეალიზაციის შედეგად კახეთის რეგიონის მევენახეებმა შემოსავლების სახით 20,7 მლნ ლარი მიიღეს. ღვინის კომპანიებს ყურძენი უკვე 4 ათასზე მეტმა მევენახემ ჩააბარა.
”ამ ეტაპისთვის რთველის საკოორდინაციო შტაბში დარეგისტრირებულია 132 ღვინის კომპანია. ყურძნის გადამუშავების პროცესში უკვე ჩართულია 40 ღვინის კომპანია, მათ შორის, 11 სახელმწიფოს მიერ დაქირავებული საწარმო, დანარჩენი კერძო ღვინის კომპანიაა, რომლებიც განლაგებულია სიღნაღის, დედოფლისწყაროს, გურჯაანის, ყვარლის, ლაგოდეხის, თელავისა და ახმეტის მუნიციპალიტეტებში. გადამუშავებული ყურძნის რაოდენობით მუნიციპალიტეტების მიხედვით შემდეგი მდგომარეობაა: გურჯაანი - 7,5 ათასი ტონა, ყვარელი - 5,8 ათასი ტონა, სიღნაღი - 5,5ათასი ტონა, თელავი - 4,2 ათასი ტონა, დედოფლისწყარო - 1,2 ათასი ტონა, ლაგოდეხი - 162 ტონა, ახმეტა - 127 ტონა და საგარეჯო - 217 ტონა. ყურძნის მოსავლის რეალიზაციის ხელშეწყობის მიზნით, საქართველოს მთავრობის გადაწყვეტილებით, ღვინის კომპანიებში ყურძნის ჩამბარებელ ფიზიკურ პირებზე სუბსიდია გაიცემა: კახეთის რეგიონში “რქაწითელზე” და “კახური მწვანეზე” - 1 კგ-ზე - 0,45 ლარი; “საფერავზე” - 1 კგ-ზე - 0,20 ლარი; რაჭა-ლეჩხუმისა და ქვემო-სვანეთის რეგიონში “მუჯურეთული/ალექსანდროულზე” - 1 კგ-ზე - 2 ლარი”, - ნათქვამია ინფორმაციაში.