მილიარდერმა ალექსანდრე ჯაფარიძემ მორიგ იახტაში 80 მილიონი ევრო გადაიხადა

კომპანია Eurasia Drilling Company-ს თანამფლობელმა, რუსეთში მცხოვრებმა მილიარდერმა ალექსანდრე ჯაფარიძემ 80 მილიონ ევროდ ღირებული ახალი იახტა შეიძინა.

ჯაფარიძის ახალი იახტა, რომელსაც მილიარდერმა "ბითლზის" ცნობილი ჰიტის Here Comes the Sun სახელი უწოდა, ჰოლანდიურმა კომპანია Amels-ma 2016 წლის ივნისში გამოუწვა. იახტის სიგრძე 83 მეტრია.

იახტები ალექსანდრე ჯაფარიძის ერთ-ერთი გატაცებაა. თუმცა, აღსანიშნავია, რომ „ბიტლომანი“ მილიარდერი ყველა თავის იახტას სწორედ ლეგენდარული ბრიტანული ჯგუფის ჰიტების სახელს არქმევს. 2005 წელს შეძენილ პირველ იახტას ალექსანდრე ჯაფარიძემ Let it Be უწოდა, მეორეს - Imagine.

რუსეთის ფედერაციაში ერთ-ერთი ყველაზე დიდი ნავთობსაბურღი კომპანიის პრეზიდენტი, ალექსანდრე ჯაფარიძე 1955 წელს დაღესტანში, ქალაქ მახაჩყალაში დაიბადა. მოსკოვში ნავთობქიმიისა და გაზის წარმოების ინსტიტუტი დაამთავრა და ინჟინერ-გეოფიზიკოსის პროფესიას დაეუფლა. თუმცა ის, თუ როგორ აირჩია მახაჩყალელმა ბიჭმა სამომავლო პროფესია, ეს მისი ბიოგრაფიის ერთ-ერთი ყველაზე საინტერესო დეტალია. სკოლის პერიოდში, ალექსანდრე ჯაფარიძე სერიოზულად იყო გატაცებული ფიზიკით და მათემატიკით. ხშირად იმარჯვებდა სასკოლო ოლიმპიადებში, ამიტომ, მოსკოვში რომ ჩავიდა, მტკიცედ ჰქონდა გადაწყვეტილი მოსკოვის სახელმწიფო უნივერსიტეტში, ფიზიკა-მათემატიკის ფაკულტეტზე ჩაებარებინა. სამწუხაროდ ან შეიძლება საბედნიეროდაც, ჯაფარიძემ  ვერ შეძლო სახელმწიფო უნივერსიტეტში გამოცდების წარჩინებით ჩაბარება. მოხდა ისე, რომ ერთ დღეს, იმედგაცრუებული აბიტურიენტი, მოსკოვის ქუჩაში სერინობისას ნავთობქიმიისა და გაზის წარმოების ინსტიტუტს გადააწყდა. სასწავლებლის წინ, განცხადებების დაფაზე, ფაკულტეტების გამოცდების ცხრილი იყო გამოკრული. ცოტა ცნობისმოყვარეობისა და ცოტაც უსაქმურობის გამო, ალექსანდრე ჯაფარიძემ გადაწყვიტა ცხრილი ჩაეკითხა. საკმაოდ ვრცელ დავთარში გეოფიზიკის ფაკულტეტი ამოიკითხა. თითქოს გონება გაუნათდაოა, ერთი საინტერესო და შეიძლება ითქვას, საბედისწერო შემთხვევა გაახსენდა. როცა მახაჩკალიდან მოსკოვში მიემგზავრებოდა, ახლობლებთან ერთად, მის გასაცილებლად, მეგობარი გოგონაც მივიდა. ალექსანდრეს მაშინვე თვალში მოხვდაგოგონას ძვირფასი ოქროს საყურე ბრილიანტის თვლებით და ცოტა ეჭვიანობით და ცოტაც ცნობისმოყვარეობით, ამ ძვირფასეულობის წარმომავლობა იკითხა. აღმოჩნდა, რომ გოგონას ძვირფასი საყურე მამის საჩუქარი იყო, სკოლის დამთავრებასთან დაკავშირებით. ალექსანდრეს მანამდე არასდროს უკითხავს, სად მუშაობდა მეგობარი გოგონას მამა, ახლა კი მამამისის პროფესიამ განსაკუთრებით დააინტერესა. აღმოჩნდა, რომ გოგონას მამა ნავთობმომპოვებელი იყო. სწორედ ეს შემთხვევა გაახსენდა ჯაფარიძეს საგამოცდო ცხრილის კითვისას, შემდეგ გონებაში საყვარელი ფიზიკა და მათემატიკა ნავთობწარმოებასთან დააკავშირა, და გადაწყვიტა, რომ აირჩევს ისეთ პროფესიას, რომელიც შესაძლებლობას მისცემს, საყვარელ ადამიანს, სწორედ ასეთი ძვირფასი საჩუქრები გაუკეთოს. ფაქტია, რომ პროფესიის არჩევაში არ შემცდარა.

ჯერ კიდევ საბჭოთა პერიოდში, მიზანდასახული და ქართული წარმომავლობის მქონე ალექსანდრე ჯაფარიძე, გეოფიზიკოსთა ექსპედიციის ხელმძღვანელად დაინიშნა. შემდეგ, ამ მიმართულებით, საბჭოთა-იაპონურ წარმოებას ხელმძღვანელობდა. მოგვიანებით დროს აუწყო ფეხი და თავად შექმნა კომპანია "პეტროალიანსი", რომელიც დაინტერესებულ კომპანიაბს სრულ მომსახურებას უწევდა ნავთობმოპოვების სფეროში. არც ამაზე გაჩერებულა და მოგვიანებით თავად ჩამოაყალიბა საბურღი კომპანია და ახლა მხოლოდ მისი კომპანიის წილად რუსეთში ნავთობმოპოვების სამუშაოების თითქმის 20% მოდის, ხოლო მის დამკვეთებს შორის არიან ისეთი ცნობილი ნავთობკომპანიები, როგორიცაა "ლუკოილი", "როსნეფტი", "გაზპრომნეფტი" და ა.შ.

"ფორბსის" ბოლო მონაცემებით, ალექსანდრე ჯაფარიძის ქონება 1,2 მილიარდი დოლარია.