ხაშური-ახალციხე-ვალეს საავტომობილო გზის რეაბილიტაციისთვის 1 მილიონ 376.748 ათასი ლარია გამოყოფილი

რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი ყოველკვირეული ფოტორეპორტაჟის რუბრიკაში ხაშური-ახალციხე-ვალეს საავტომობილო გზის სარეაბილიტაციო სამუშაოების ამსახველ ფოტომასალას ავრცელებს.

როგორც რეგიონული განვითარების და ინფრასტრუქტურის სამინისტროს მიერ გავრცელებულ ინფორმაციაშია ნათქვამი, აღნიშნული გზა ერთმანეთთან საქართველოსა და თურქეთის რესპუბლიკას აკავშირებს. ამ გზით ხორციელდება საერთაშორისო მიმოსვლა და საზრანზიტო გადაზიდვები.

ხაშური-ახალციხე-ვალეს საავტომობილო გზის 2 კილომეტრიანი მონაკვეთის (კმ61-კმ62) რეაბილიტაციის პროექტი ითვალისწინებს: გზის საფუძვლის მოწყობას, ორფენიანი ასფალტ-ბეტონის საფარის დაგებას, ადგილობრივ გზებთან მიერთებების, მოსახლეობის ეზოებში შესასვლელების, ბეტონის პარაპეტების, ავტობუსის გასაჩერებელი მოედნის, ტროტუარების, გაბიონების ხელოვნური ნაგებობების საორიენტაციო ბოძკინტებისა და ლითონის ზღუდარების მოწყობას. ასევე, გზის ჰორიზონტალური მონიშვნის სამუშაოებს.

სარეაბილიტაციო მონაკვეთზე, ამ ეტაპზე, ბორდიურების, ტროტუარების, მოსახლეობის ეზოებში შესასვლელებისა და ადგილობრივ გზებთან მიერთებების სარეაბილიტაციო სამუშაოები მიმდინარეობს.

პროექტი სახელმწიფო ბიუჯეტიდან ფინანსდება და მისი ღირებულება 1 მილიონ 376.748 ათასი ლარია. სამუშაოები მიმდინარე წლის ბოლომდე დასრულდება.