Apple-ის პროდუქციის ქართველ რეალიზატორებს შორის დაპირისპირება მძაფრდება.
კონკურენციის სააგენტომ „ iplus”-ს , „istyle”- სა და „apply city”-ის წინააღმდეგ საქმის მოკვლევა დაიწყო. აღნიშნულ სამ კომპანიას „iTechnic”-ი უპირისპირდება. კომპანიამ კონკურენციის სააგენტოს საჩივრით მიმართა. ინფორმაცია კონკურენციის სააგენტოს ოფიციალური ფეისბუქის გვერდზე ვრცელდება.აიტექნიკი კონკურენტი ბაზრის სამ მოთამაშეს კარტელურ გარიგებაში ადანაშაულებს. როგორც „iTechnic”-ის ადვოკატი ამბობს, კომპანიები აიფონისა და ეფლის სხვა პროდუქციის ფასებს ქართულ ბაზარზე შეთანხმებულად, ხელოვნურად ადგენენ. კონკურენციის სააგენტოს სამი თვე აქვს იმისთვის, რათა დაადგინოს რამდენად შეესაბამება სიმართლეს „iTechnic” -ის საჩივარი და უწევთ თუ არა აიფონის ქართველ მომხმარებლებს პროდუქციაში იმაზე მეტის გადახდა, ვიდრე სინამდვილეში ღირს.
შეგახსენებთ, რომ ჯანსაღი კონკურენციის პირობებში კომპანიებს არ აქვთ უფლება:
1. ბოროტად გამოიყენონ მათი დომინირებული მდგომარეობა ბაზარზე.
2. დადონ ჰორიზონტალური თუ ვერტიკალური შეთანხმებები კონკურენციის შეზღუდვის მიზნით
3. ეკრძალებათ არაკეთილსინდისიერი კონკურენცია სხვა კომპანიებთან;
4. არასამართლიანი ფასების დადგენა ბაზარზე ურთიერთშეთანხმებით და ამით მომხმარებელთა დაზარალება;
5. კონკურენციის შეზღუდვას წარმოადგენს ასევე ურთიერთდამოკიდებული პირების მიერ კომპანიების მართვა.
ბაზარზე კონკურენციაზე პასუხისმგებელი ორგანოს მიერ კომპანიების დაჯარიმება მსოფლიოში აპრობირებული პრაქტიკაა და ცივილიზებულ მსოფლიოში ჯანსაღი ბიზნეს გარემოს ჩამოყალიბების ერთ-ერთ მთავარ განმსაზღვრელ ფაქტორად მიიჩნევა.