ტყიბულის მინდელის სახელობის მაღაროში 51 წლის მამაკაცი გარდაცვლილი იპოვეს
ტყიბულის მინდელის სახელობის მაღაროში, 51 წლის თემურ კაკაურიძე გარდაცვლილი იპოვეს. როგორც მეტალურგიული, სამთო და ქიმიური მრეწველობის მუშაკთა პროფკავშირის თავმჯდომარემ თამაზ დოლაბერიძემ განაცხადა, შემთხვევა 7 ოქტომბერს ტყიბულის მინდელის სახელობის მაღაროს, მე-6 უბანზე მოხდა.
„როგორც ადგილობრივები აცხადებენ, დილით, 07:00 საათზე, როდესაც შახტაში დილის ცვლის მეშახტეები ჩავიდნენ, იგი უკვე გარდაცვლილი იყო. სავარაუდოდ, მან გონება დაკარგა და წაიქცა. გარდაცვლილს სახეზე დაზიანებები აღენიშნებოდა“, - განაცხადა დოლაბერიძემ.
მისივე თქმით, ცხედარს ექსპერტიზა ჩაუტარდა, რომლის პასუხი მოგვიანებით გახდება ცნობილი.
“მუშების განცხადებით, წინა დღეებში შახტაში „დაგაზიანება იყო“, ანუ ნახშირორჟანგი იყო დაგროვილი“, - აღნიშნა დარგის პროფკავშირის თავმჯდომარემ.
დოლაბერიძის ინფორმაციით, თემურ კაკაურიძემ შახტაში მუშაობა სამი თვის წინ დაიწყო.