"თბილისში დღეს იმაზე უნდა ფიქრობდნენ, როგორ გაიხსნას სავაჭრო გზები სამხრეთ აზიის ქვეყნებთან"
საქართველომ ინდოეთთან, პაკისტანთან და ბანგლადეშთან პირდაპირი სავაჭრო გზების გახსნაზე დღესვე უნდა დაიწყოს მუშაობა - ამის შესახებ ცენტრალური აზიისა და კავკასიის ინსტიტუტის თავმჯდომარემ ფრედ სტარმა ამერიკა-საქართველოს ბიზნესსაბჭოს მიერ ორგანიზებულ კონფერენციაზე ”საქართველო და აბრეშუმის გზის დინამიკა” განაცხადა.
“ამერიკის ხმის” ქართული რედაქცია წერს, რომ კონფერენციას, რომელზეც საქართველოს ეკონომიკურ პოტენციალსა და “აბრეშუმის გზის“ პროექტში ქვეყნის როლზე ისაუბრეს, საქართველოს ოფიციალური პირები, ამერიკის ბიზნეს წრეების წარმომადგენლები და ეკონომიკის და პოლიტიკის ანალიტიკოსები ესწრებოდნენ.
„თბილისში დღეს იმაზე უნდა ფიქრობდნენ, როგორ გაიხსნას სავაჭრო გზები სამხრეთ აზიის ქვეყნებთან. ამ თემებზე ჯერ არავინ საუბრობს, მაგრამ ეს ბუმი გარდაუვალია და საქართველომ რაც შეიძლება მალე თადარიგი უნდა დაიჭიროს, რომ ამ პროცესების ნაწილი გახდეს. პაკისტანს დღესვე აქვს შესაძლებლობა ექსპორტს კავკასიის გავლით აწარმოებდეს, მაგრამ ეს მარშრუტი დღეს არ არსებობს. სტრატეგიული მდებარეობიდან გამომდინარე, სამხრეთ-აღმოსავლეთი აზია - ინდოეთი, პაკისტანი, ბანგლადეში და ვიეტნამიც კი - საქართველოს გავლით თავისუფლად შეიძლება აწარმოებდეს ევროპასთან ვაჭრობას კავკასიის გავლით. ეს უნიკალური შესაძლებლობაა, რომელიც თბილისმა რაც შეიძლება მალე უნდა გამოიყენოს. ამ თემებზე საუბარი ჯერ არ მიმდინარეობს. ვფიქრობ, ყურადღებას მხოლოდ ახლო მომავალზე ვამახვილებთ და შორს ვერ ვხედავთ”, - განაცხადა სტარმა.
ამერიკის ყოფილმა ელჩმა საქართველოში რიჩარდ ნორმანდმა განაცხადა, რომ საქართველო რეგიონის წამყვანი ქვეყანაა, რომელსაც არა მხოლოდ სატრანსპორტო ინფრასტრუქტურა, არამედ დამხმარე, ეგრეთ წოდებული „რბილი ინფრასტრუქტურაც“ აქვს განვითარებული - ეს კი აუცილებელი კომპონენტია იმისთვის, რომ „აბრეშუმის გზაზე“ ქვეყანამ თავი დაიმკვიდროს.
„საქართველოს მრავალ-ვექტორიანი საგარეო პოლიტიკა აქვს საკუთარი ეკონომიკური და პოლიტიკური ინტერესების დასაცავად. საქართველო ლიდერი ქვეყანაა, რომელიც ევროპასთან, ამერიკასთან, ჩინეთთან და მთელს რეგიონთან ეკონომიკური კავშირებს აძლიერებს”, - განაცხადა ყოფილმა ელჩმა საქართველოში.
მან ასევე აღნიშნა, რომ „საქართველო იმის მოდელია, თუ როგორ უნდა გაიგზავნოს ტვირთი ეფექტურად და არაკორუფციული გზით.“
საქართველოს ეროვნული ბანკის პრეზიდენტმა კობა გვენეტაძემ კონფერენციის მონაწილეებს მიმდინარე ეკონომიკური პროგრესის და საინვესტიციო პოტენციალის შესახებ ინფორმაცია მიაწოდა.
„ხდება დაახლოება ევროპასთან. ამასთან, იზრდება ინტერესი ჩინეთიდან, თურქეთიდან იმისთვის, რომ საქართველოში უფრო მეტი ინვესტიციები განახორციელონ. იმ პროდუქციას, რომელიც წარმოებული იქნება საქართველოში ექნება გასაღების ძალიან კარგი შანსი ევროპის ქვეყნებში. შესაბამისად, „აბრეშუმის გზა“ მნიშვნელოვანი ინიციატივაა და ჩვენ აქტიურად უნდა გავაგრძელოთ მუშაობა”, - განაცხადა გვენეტაძემ.