8 ოქტომბრის არჩევნებში მონაწილეობა 1 814 276-მა ამომრჩეველმა მიიღო

8 ოქტომბრის არჩევნებში მონაწილეობა მილიონ 814 276-მა ამომრჩეველმა მიიღო. ამის შესახებ ჟურნალისტებს ცენტრალური საარჩევნო კომისიის სპიკერმა ანა მიქელაძემ გუშინ განუცხადა.

მისი თქმით, ამომრჩეველთა უმეტესობა, 51,1% ქალებს წარმოადგენდა, ხოლო 48,9% კაცს. ცესკოს სპიკერმა ასევე საჩივრების შეტანის ვადებსა და განხილვის პროცედურებზეც ისაუბრა. მისი თქმით, გუშინ, 18.00 საათზე ამოიწურა საოლქო საარჩევნო კომისიებში საჩივრების შეტანის ვადა და მათი განხილვის პროცესი მიმდინარეობს.

პროცედურის თანახმად, საოლქო საარჩევნო კომისია საჩივრებს განიხილავს მათი რეგისტრაციიდან 2 დღის ვადაში, ხოლო საოლქო საარჩევნო კომისიების განკარგულებები შესაძლოა გასაჩივრდეს სასამართლოში. ჯამში 73 საოლქო საარჩევნო კომისიაში რეგისტრირებულია 539 საჩივარი. ბოლო მონაცემებით, საოლქო საარჩევნო კომისიების მიერ 6 უბნის შემაჯამებელი ოქმი ბათილად გამოცხადდა.

ცესკოს პრესსპიკერის ცნობით, ყველა საარჩევნო უბნის მონაცემები დათვლილია და ხელმისაწვდომია ნებისმიერი მსურველისთვის, ცენტრალური საარჩევნო კომისიის ვებგვერდზე. მიქელაძის თქმით, ამ ეტაპზე მიმდინარეობს მონაცემების გადამოწმებისა და დაზუსტების პროცესი.

„ამ ეტაპზე მიმდინარეობს მონაცემების გადამოწმებისა და დაზუსტების პროცესი. შეგახსენებთ, რომ პროპორციული არჩევნების შედეგების საბოლოო შეჯამება უნდა დასრულდეს არა უგვიანეს 27 ოქტომბრისა“, - განაცხადა ანა მიქელაძემ.

რაც შეეხება არჩევნების მეორე ტურს, კანონმდებლობის თანახმად, მეორე ტურების გამართვის ბოლო ვადა, მიმდინარე წლის 2 ნოემბერია. ცენტრალური საარჩევნო კომისიის ინფორმაციით, არჩევნების მეორე ტურში მონაწილეობს ორი კანდიდატი, რომლებმაც პირველ ტურში სხვებზე მეტი ხმა მიიღეს. არსებული წინასწარი მონაცემებით, მეორე ტურები გაიმართება 50 მაჟორიტარულ ოლქში. თუმცა, საბოლოო მონაცემები ცნობილი გახდება კანონით განსაზღვრული შესაბამისი პროცედურების დასრულების შემდეგ.