”ქართუს” დაფინანსებით ბათუმის მწერალთა სახლის რესტავრირებული შენობა საზეიმოდ გაიხსნა
ბათუმის მწერალთა სახლის რესტავრირებული შენობა საზეიმოდ გაიხსნა. როგორც ფონდი ”ქართუ” იუწყება, ფონდმა 5 თვეში მთლიანად განაახლა ამორტიზებული და ფაქტიურად დანგრევის პირას მისული შენობა.
1904 წელს აშენებულ შენობაში ბათუმის მწერალთა სახლი 1957 წლიდან ფუნქციონირებს. ათწლეულების განმვალობაში შენობაში არ ჩატარებულა გამაგრებითი სამუშაოები და იყო საფრთხე, ქვეყანას დაეკარგა კულტურული მემკვიდრეობის ეს ძეგლი.
საქართველოს მწერალთა კავშირის აჭარის ორგანიზაციის თავმჯდომარემ, დავით დეთორაძემ, აჭარის მთავრობის მეთაურთან ზურაბ პატარაძესთან და “ფონდი ქართუს” ხელმძღვანელთან ნიკოლოზ ჩხეტიანთან ერთად დაათვალიერა რესტავრირებული შენობა და მასში განთავსებული ჟურნალი “ჭოროხის” რედაქცია. მწერალთა სახლის ფუნქციონირების განახლებასთან ერთად აღდგება ჟურნალ “ჭოროხის” გამოცემაც.
”ბათუმის მწერალთა სახლის გარდა “ფონდი ქართუ” ბათუმში ახორციელებს დრამატული თეატრის რესტავრაციასა და “ბათუმის რაგბის კომპლექსის მშენებლობას”. პარალელურად მიმდინარეობს ბოტანიკური ბაღში მეწყერსაშიში ზონების გამაგრება. სარესტავრაციო სამუშაოებს აწარმოებს ასოციაცია “ატუ”, - ნათქვამია ინფორმაციაში.