საქართველო-ჩინეთის მეგობრობის ასოციაციამ საპატიო პრეზიდენტი აირჩია
საქართველოს სავაჭრო-სამრეწველო პალატასთან არსებული საქართველო-ჩინეთის მეგობრობის ასოციაციამ საპატიო პრეზიდენტი აირჩია.
როგორც საქართველოს სავაჭრო-სამრეწველო პალატაში განაცხადეს, ოფიციალურ ოქმს ამის შესახებ ხელი დღეს მოეწერა. დოკუმენტი ასოციაციის დამაარსებლებმა- საქართველოს სავაჭრო-სამრეწველო პალატამ და საქართველო-ჩინეთის ეკონომიკურ-კულტურული თანამშრომლობის ცენტრმა გააფორმეს.
მათივე ინფორმაციით, პალატასთან არსებული ასოციაციის პრეზიდენტი ხელმოწერილი ოქმის თანახმად ჩინეთში გავლენიანი ბიზნესმენეჯერი ჯიანჯუნ ზანგი გახდა. სიმბოლურად საპატიო პრეზიდენტობის სიგელი მას საქართველოს პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა გადასცა.
საქართველო-ჩინეთის მეგობრობის ასოციაცია საქართველოს სავაჭრო-სამრეწველო პალატისა და საქართველო-ჩინეთის ეკონომიკური-კულტურული თანამშრომლობის ცენტრის ერთობლივი ინიციატივით დაარსდა. ორგანიზაციის მიზანი ორ ქვეყანას შორის ეკონომიკური, სამეცნიერო, კომერციული, საგანმანათლებლო, სოციალური და კულტურული ურთიერთობების გაღრმავებაა. ასოციაციას უფლება აქვს გაწევრიანდეს სხვადასხვა ორგანიზაციებში, ჰქონდეს პირდაპირი საერთაშორისო ურთიერთობები, დადოს შეთანხმებები. ასოციაციის წესდების თანახმად მისი ძირითადი მოვალეობა ბიზნეს, სასწავლო და შემეცნებითი ღონისძიებების ორგანიზება და ინვესტიციების მოზიდვის ხელშეწყობა იქნება.
საქართველოს სავაჭრო-სამრეწველო პალატის ინფორმაციით, ასოციაციის ახლად არჩეული საპატიო პრეზიდენტი ჯიანჯუნ ზანგი ჩინეთში კომპანია CEFC CHINA ENERGY COMPANY LIMITED-ის აღმასრულებელ დირექტორად მუშაობს. CEFC CHINA ENERGY COMPANY LIMITED ჩინეთში 10 ყველაზე გავლენიან კომპანიას შორის ერთ-ერთია. მისი ძირითადი ელექტროენერგია და გაზია, თუმცა კომპანია საქმიანობს ასევე სატრანსპორტო, ტურისტულ და საფინანსო სექტორში. კომპანიას განხორციელებული აქვს ინვესტიციები აღმოსავლეთ ევროპაში. 2015 წელს კომპანიის შემოსავალმა 39 მილიარდს მიაღწია. კომპანია ასევე ახორციელებს ინფრასტრუქტურული პროექტებით და საქართველოში 10 მილიარდი დოლარის ოდენობის ინვესტიციის ჩადებითაა დაინტერესებული.