თბილისის საკრებულოში 2016 წლის ბიუჯეტში ცვლილებების შეტანის საკითხის განხილვა კამათის ფონზე მიმდინარეობს

თბილისის საკრებულოში ამ წუთებში 2016 წლის ბიუჯეტში ცვლილებების შეტანის საკითხს განიხილავენ. სხდომაზე აღნიშნული საკითხი განსახილველად თბილისის მერიის საფინანსო სამსახურის უფროსმა გაიოზ თალაკვაძემ წარმოადგინა.

საკრებულოს სხდომას ასევე ვიცე-მერი ლაშა აბაშიძე და მერიის შესაბამისი სამსახურების წარმომადგენლები ესწრებიან. როგორც სხდომაზე ითქვა, ცვლილება 14 მილიონ ლარს შეეხება. საკრებულოს ოპოზიციონერმა დეპუტატებმა მერიის წარმომადგენლისგან მოითხოვეს დაზუსტება, თუ რა მუხლებს შეეხება აღნიშნული ცვლილება და დეტალური ინფორმაცია მოითხოვეს თანხების ხარჯვასთან დაკავშირებით. კერძოდ, ფრაქცია „რესპუბლიკელების“ თავმჯდომარე ხათუნა სამნიძე დაინტერესდა, 8 მილიონი ლარი კონკრეტულად საბავშვო ბაღებისათვის რა მიზნით დაიხარჯება.

ფრაქცია „ნაციონალური მოძრაობა – თბილისის“ წევრ ირაკლი ნადირაძის თქმით კი, 8 მილიონიდან ბაღების კვებისთვის დაუსაბუთებელია 6 მილიონი ლარის გამოყოფა.

საკრებულოს დამოუკიდებელმა დეპუტატმა ალეკო ელისაშვილმა კი, თბილისში ავარიული სახლების გამაგრების ხარჯების 660 ათასი ლარით შემცირება გააპროტესტა. ელისაშვილის თქმით, არაერთი სახლია ძველ თბილისში, რომელთა მცხოვრებლებს ჭერი თავზე ენგრევათ. სხდომაზე ასევე ფრაქცია „ნაციონალური მოძრაობა – თბილისის“ თავმჯდომარე ირაკლი აბესაძემ მერიის წარმომადგენლებისგან განმარტებები კომუნალური სუბსიდირების თანხების ხარჯვასთან დაკავშირებით მოითხოვა. აბესაძის თქმით, მერიას ამ მუხლით გათვალისწინებული 3 მილიონ 700 ათასი ლარი რჩება. აბესაძის განმარტებით, სოციალურად დაუცველ 35 000 ოჯახს თვეში ამ მიზნით 106 ლარი უნდა მოხმარდეს, რაც 4 მილიონ 500 000 ლარს შეადგენს. აბესაძე დაინტერესდა სოციალურად დაუცველი 70 000 ქულაზე ნაკლები ოჯახები მიიღებენ თუ არა თვეში კვლავაც 106 ლარს კომუნალური სუბსიდიისთვის.

ირაკლი აბესაძეს სხდომაზე ფრაქცია „ქართული ოცნების“ თავმჯდომარე რიმა ბერაძე გამოეხმაურა. მისი თქმით, 70 000 ქულის მქონე სოციალურად დაუცველი ოჯახები კომუნალური ვაუჩერისთვის 106 ლარს მიიღებენ, ხოლო სხვა ოჯახები, რომელთაც 200 000-მდე ქულა აქვთ, სუბსიდიას სულადობის მიხედვით მიიღებენ. კერძოდ, 4 და მეტსულიანი ოჯახებისათვის დასუფთავების მოსაკრებელისათვის თითოეულ სულზე 1 ლარი და 60 თეთრი დაემატა. ბერაძემ აღნიშნა, რომ 200 000 ქულის მქონე სოციალურად დაუცველი სულ თბილისში 90 000 ოჯახია.