"აშშ-დან არალეგალი მიგრანტების უბრალოდ დეპორტირება ძალიან მძიმე სოციალურ პრობლემას გამოიწვევს"

საქართველოს ატლანტიკური საბჭოს ვიცე-პრეზიდენტის, ბათუ ქუთელიას შეფასებით, აშშ-დან არალეგალი მიგრანტების უბრალოდ დეპორტირება ძალიან მძიმე სოციალურ პრობლემას გამოიწვევს, სანამ ის კონკრეტულ სამართლებრივ ჩარჩოებში არ მოექცევა.

როგორც ბათუ ქუთელიამ განაცხადა, დონალდ ტრამპი ამჟამად არის President-elect (ახლადარჩეული პრეზიდენტი გარდამავალ პერიოდში - არჩევნებიდან თანამდებობის დაკავებამდე) და ვიდრე ახალი ადმინისტრაცია მუშაობას შეუდგება და ყველაფერი რეალურ პოლიტიკაში გარდაიქმნება, დასკვნების გაკეთება ნაადრევია.

„ტრამპის წინასაარჩევნო განცხადებები გარკვეულწილად ეხებოდა მექსიკიდან შემოსულ არალეგალ მიგრანტებს, რაზეც მან რამდენიმე განცხადება გააკეთა საკმაოდ ექსტრემალური ლექსიკის გამოყენებით და შემდეგ მოუწია სხვადასხვა ფორმით განმარტების გაკეთება. რეალურად, ამერიკის დღის წესრიგში დიდი ხანია დგას პრობლემა, რომ მიგრაცია მოექცეს გარკვეულ ჩარჩოებში და ლეგალური გახდეს. მოგეხსენებათ, შეერთებული შტატებისთვის მიგრაციის პოლიტიკა ამ ქვეყნის შექმნის დასამაბიდან ძალიან მნიშვნელოვანი კომპონენტი იყო როგორც სოციალური, ასევე, ეკონომიკური განვითარებისთვის და რამდენჯერმე ტრამპმა და მისი გუნდის წევრებმაც გააკეთეს განცხადება, რომ ეს გულისხმობს გარკვეულ მოწესრიგებას. თუმცა ფორმა, რა ფორმითაც მან ეს გამოხატა, საკმაოდ ექსტრემალური იყო. რაც შეეხება კედელს, კედლის აშენება სრული აბსურდია“, - განაცხადა ბათუ ქუთელიამ.

მისივე თქმით, უნდა დეველოდოთ, რამდენად გადავა რეალურ პოლიტიკაში ტრამპის განცხადებები.

„დღეს ის არის „President-elect“. ადმინისტრაციის საბოლოოდ ჩამოყალიბების შემდეგ კი გააკეთებენ განცხადებებს, რა პოლიტიკა იქნება, რა ქმედებებს განახორციელებენ. როგორც ჩანს, ტრამპის ამოცანაა, რომ ფუნდამენტური რეფორმები განახორციელოს ბევრი მიმართულებით. მისი გუნდის რამდენიმე წევრი აცხადებს, რომ ისინი არიან ე.წ. რეიგანისტები, ანუ რეიგანის პოლიტიკის მიმდევრები როგორც საშინაო, ისე საგარეო პოლიტიკის მიმართულებით. ეს არის უფრო კონსერვატიული დღის წესრიგი, რომელიც გარკვეულწილად გულისხმობს ეკონომიკურ თუ სოციალურ პროექტებს და პოლიტიკას, რომელიც მიმართული იქნება სამუშაოების გაზრდაზე, გადასახადების შემცირებაზე დიდი ბიზნესისთვის, რათა მათ შეძლონ ხალხის დასაქმება. რაც შეეხება არალეგალურ მიგრაციას, ესეც ითვლება პრობლემად სწორედ ასეთი ტიპის ბიზნესებისთვის. ოღონდ აქ უნდა განვასხვავოთ არალეგალური და ლეგალური მიგრაცია. არალეგალური მიგრაციის კონტექსტში, უბრალოდ ამ ხალხის დეპორტირება, ბუნებრივია, ძალიან მძიმე სოციალურ პრობლემას გამოიწვევს, სანამ ის არ მოექცევა კონკრეტულ სამართლებრივ ჩარჩოებში - რის საფუძველზე ხდება მიგრანტების მიღება ან მათი გაძევება ქვეყნიდან“, - განაცხადა ბათუ ქუთელიამ.

აშშ-ის ახალარჩეულმა პრეზიდენტმა დონალდ ტრამპმა დაადასტურა, რომ ამერიკა-მექსიკის საზღვარზე კედლის აშენებას გეგმავს. ამის შესახებ მან ტელეკომპანია CBS-თან საუბრისას განაცხადა. ინტერვიუ ეთერში ჯერ არ გასულა, თუმცა ტელეკომპანიამ გაავრცელა ანონსი, სადაც ტრამპი აცხადებს, რომ აშშ-დან 3 მილიონი მიგრანტის დეპორტირებაც მოხდება.