ქრთამის აღების ბრალდებით რუსეთის ეკონომიკის მინისტრი დააკავეს

რუსეთის ფედერაციის საგამოძიებო კომიტეტმა რუსეთის ეკონომიკური განვითარების მინისტრის ალექსეი ულუკაევის წინააღმდეგ სისხლის სამართლის საქმე აღძრა.

საქმე ეხება 2 მილიონი აშშ დოლარის ოდენობის ქრთამის აღებას. აღნიშნულ ინფორმაციას სააგენტო „რია ნოვოსტი“ ავრცელებს.

როგორც საგამოძიებო კომიტეტში აღნიშნეს, სისხლის სამართლის საქმე მინისტრთან მიმართებაში აღძრულია „როსნეფტის“ მიერ ნავთობის კომპანია „ბაშნეფტის“ აქციების სახელმწიფო პაკეტის შეძენასთან დაკავშირებით. ეკონომიკის განვითარების სამინისტროს, რომელსაც ალექსეი ულუკაევი ხელმძღვანელობს, უნდა გაეკეთებინა დასკვნა ხელშეკრულების თაობაზე.

„საუბარი მიდის „როსნეფტის“ წარმომადგენლებისთვის ქრთამის გამოძალვაზე და მუქარაზე“, - აცხადებს საგამოძიებო კომიტეტის წარმომადგენელი სვეტლანა პეტრენკო.

მისი თქმით, მინისტრი 2 მილიონი აშშ დოლარის ოდენობის ქრთამის აღებისას დააკავეს.

რუსეთის პრეზიდენტის პრესმდივანის დიმიტრი პესკოვის განცხადებით, ულუკაევის წინააღმდეგ წარდგენილია ძალიან სერიოზული ბრალდება, რაც ითხოვს „ძალიან სერიოზულ მტკიცებულებებს“.