”მნიშვნელოვანია ვისაუბროთ იმ შესაძლებლობებზე, რომელიც ქართულ კომპანიებს ამერიკულ ბაზარზე ექნება“

„ევროკავშირი-საქართველოს ბიზნეს საბჭოს“ (EUGBC) ორგანიზებით, ამერიკის შეერთებულ შტატებში საქართველოს დანიშნული ელჩი, დავით ბაქრაძე EUGBC–ის წევრი ბიზნესკომპანიების წარმომადგენლებს შეხვდა. „ევროკავშირი-საქართველოს ბიზნესსაბჭოს“ (EUGBC) გენერალური მდივნის ზვიად ჭუმბურიძის შეფასებით, მნიშვნელოვანია, რომ აშშ-სთან საქართველოს მსგავსი პოლიტიკურ-ეკონომიკური ურთიერთობები აქვს.

მისივე თქმით, სასიამოვნოა, რომ აშშ-ში საქართველოს ელჩი არის დავით ბაქრაძე, რომელსაც დიპლომატიურ საქმიანობაში დიდი გამოცდილება აქვს.

„დღეს განვიხილეთ ბიზნესის განვითარებასთან დაკავშირებული საკითხები. ჩვენ რაც უნდა ბევრი რამ ვაწარმოოთ, აშშ-ში ბაზარზე რაიმე განსაკუთრებულ ადგილს ვერ დავიკავებთ. თუმცა, არის გარკვეული პროდუქცია, რაც შეიძლება ბაზარზე შევიდეს და მოკრძალებული ადგილი დაიკავოს. სწორედ ამისთვის სერიოზული სამუშაოა ჩასატარებელი“, - განაცხადა ჭუმბურიძემ.

მისივე თქმით, 2017 წლის ბოლოს 2018 წლის დასაწყისში იგეგმება მრგვალი მაგიდის გამართვა, რომელშიც ამერიკული და ქართული კომპანიების წარმომადგენლები მიიღებენ მონაწილეობას.

როგორც ჭუმბურიძემ აღნიშნა, ასევე შესაძლებელია, რომ ქართული პროდუქციის გამოფენა გაიმართოს.

თავის მხრივ, აშშ-ში საქართველოს ელჩმა დავით ბაქრაძემ აღნიშნა, რომ საქართველო-აშშ-ს ორმხრივ ურთიერთობებში სავაჭრო და ეკონომიკური კავშირები ერთ-ერთი პრიორიტეტია.

„ეს არის ასევე ნაწილი ორმხრივი სტრატეგიული პარტიორობის ქარტიისა, აქედან გამომდინარე, ბიზნესს, რომელსაც აინტერესებს ამერიკული ბაზარი, იმ ამერიკულ კომპანიებს, რომლებიც საქართველოში არიან წარმოდგენილები, მნიშვნელოვანია, რომ დაველაპარაკოთ იმ შესაძლებლობებსა და ახალ სივრცეებზე, რომელსაც ჩვენი ქვეყნის განვითარების კვალდაკვალ ვქმნით საქართველოში, ვუქმნით ამერიკულ ბიზნეს. ასევე მნიშვნელოვანია ვისაუბროთ იმ შესაძლებლობებზე, რომელიც ქართულ კომპანიებს ამერიკულ ბაზარზე ექნება“, - განაცხადა დავით ბაქრაძემ.

ბაქრაძის განცხადებით, აშშ-ში გამგზავრებამდე დარჩენილ დროს, ის იყენებს იმისთვის, რათა დაინტერესებულ პირებს შეხვდეს.