ძალიან მნიშვნელოვანია ევროპის საინვესტიციო ბანკის ჩართულობა კერძო სექტორის განვითარებაში. იმედი გვაქვს, ეს პროცესი გაგრძელდება და გაძლიერდება, რაც ასევე ხელს შეუწყობს დამატებითი კერძო ინვესტიციების მოზიდვას, - ამის შესახებ საქართველოს პირველმა ვიცე-პრემიერმა, ფინანსთა მინისტრმა დიმიტრი ქუმსიშვილმა ევროპის საინვესტიციო ბანკთან სამი საფინანსო ხელშეკრულების ხელმოწერის შემდეგ გამართულ ბრიფინგზე განაცხადა.
მისი თქმით, ასევე, შესაძლებლობა იქნება კერძო სექტორის კონკურენტუნარიანობის ხელშეწყობა ინოვაციების, გაუმჯობესებული დამატებული ღირებულების და DCFTA-ის სტანდარტებისა და ვალდებულებებთან დაახლოების მიმართულებით.
„უნდა აღინიშნოს EIB-სა და ევროპის საინვესტიციო ფონდის (EIF) ერთობლივი ინიციატივა ევროკავშირთან ერთად Horizon 2020-ის ფარგლებში - InnovFin-ის მიმართულებით. აღნიშნულის ფარგლებში შესაძლებელია მცირე და საშუალო ბიზნესის მხარდაჭერა წარმოების ზრდის მხრივ ინოვაციური იდეების და კვლევების დაფინანსების მიზნით, ასევე, ტექნიკური მხარდაჭერის რჩევების თვალსაზრისით“, - განაცხადა დიმიტრი ქუმსიშვილმა.