"ლარიზაციის პროექტით მთავრობის არცერთი წევრი არ ისარგებლებს, მიუხედავად იმისა, აქვს თუ არა მას რაიმე სახის კრედიტი"

არაერთხელ განვმარტეთ და კიდევ ერთხელ განვმარტავ, რომ საქართველოს მთავრობისა და ეროვნული ბანკის პრინციპული ამოცანაა, ჩვენს ქვეყანაში უცხოური ვალუტის რყევაზე დამოკიდებულება შემცირდეს , - ამის შესახებ ჟურნალისტებს ფინანსთა მინისტრმა დიმიტრი ქუმსიშვილმა განუცხადა.

მისი თქმით, დაწყებულია ლარიზაციის პროექტი, რაც ძალიან მნიშვნელოვანია.

„დაწყებულია ლარიზაციის დიდი პროექტი, მათ შორის ერთჯერადი აქცია, რომლითაც მთავრობა ეხმარება 2015 წლის 1-ელ იანვრამდე გაცემული სესხების მქონე ადამიანებს, რომელთა მოცულობა 100 000 ლარზე ნაკლებია. საბოლოო ჯამში ეს ყველაფერი ჩვენ მოგვიხსნის დამოკიდებულებას სავალუტო რყევებზე. აქვე მინდა განვმარტო, რომ საქართველოს მთავრობამ უნდა მიიღოს წესი, თუ როგორ უნდა განკარგოს 65 მლნ ლარი. რა თქმა უნდა, მქონდა პრემიერთან ამაზე კომუნიკაცია. ეს ჩვენთვის შიგნით ისედაც ცხადი იყო. თუმცა, მინდა ვთქვა, რომ მთავრობის არცერთი წევრი არ ისარგებლებს აღნიშნული შეღავათით, მიუხედავად იმისა, მას აქვს თუ არა რაიმე სახის კრედიტი. ფიზიკური პირები, რომელთა შემოსავალი 100 000 ლარზე მეტია, ისინიც არ ისარგებლებენ აღნიშნული პროექტით“, - განაცხადა დიმიტრი ქუმსიშვილმა.