კობა გვენეტაძე - გარკვეულ პროდუქტებზე ხდება ფასების ზრდა, მაგრამ გარკვეულ პროდუქტებზე ფასების შემცირება
თქვენ აბსოლუტურად სამართლიანად აღნიშნეთ, რომ ხდება გარკვეულ პროდუქტებზე ფასების ზრდა, მაგრამ ამავე დროს გარკვეულ პროდუქტებზე ხდება ფასების შემცირება , - ამის შესახებ ეროვნული ბანკის პრეზიდენტმა კობა გვენეტაძემ პარლამენტში განაცხადა, როდესაც დეპუტატების მიერ ინფლაციასთან და ცალკეული პროდუქტების ფასების ზრდასთან დაკავშირებით დასმულ კითხვას უპასუხა.
როგორც კობა გვენეტაძემ განმარტა, საქართველოში ფასების ინდექსი გამოითვლება საერთაშორისო მეთოდოლოგიის შესაბამისად, რომლის შემოწმებას დროდადრო ახორციელებს საერთაშორისო სავალუტო ფონდი.
მისივე თქმით, ეს არის ის ორგანიზაცია, რომელიც ძირითად სტანდარტებს განსაზღვრავს იმისათვის, რათა ფასების დონის ადეკვატური განსაზღვრა მოხდეს.
”დღესდღეობით დაახლოებით 295 პროდუქტი არის ჩართული და ყოველწლიურად ხდება ამ სამომხმარებლო კალათის შეცვლა იმისდა მიხედვით, თუ რა შედეგს მოიტანს ის გამოკითხვა, რომელიც აუცილებელია ჩატარდეს ამ მეთოდოლოგიის თანახმად, ინფლაციის გამოანგარიშების გასაუმჯობესებლად.
თქვენ აბსოლუტურად სამართლიანად აღნიშნეთ, რომ ხდება გარკვეულ პროდუქტებზე ფასების ზრდა, მაგრამ ამავე დროს გარკვეულ პროდუქტებზე ხდება ფასების შემცირება.
აბსოლუტურად მართალი ხართ იმაში, რომ ეს პროცესი მიდის და იმის გამო, რომ ზოგზე ხდება ზრდა და ზოგზე შემცირება, აქედან გამომდინარე გვაქვს ის შედეგი, რომელიც უკვე საბოლოოდ ქვეყნდება. ასე რომ, ერთი ან ორი პროდუქტის ზრდა არ ნიშნავს აუცილებლად იმას, რომ ზოგადად სამომხმარებლო ფასების ინდექსი გაიზრდება და ასევე რომელიმეს შემცირება არ ნიშნავს, რომ მთლიანად სამომხმარებლო ფასების ინდექსი შემცირდება.
ბოლო ინფორმაციით, ნოემბრის ბოლოს წლიური ინფლაცია 0,6% იყო. ეს პროცესი არის აბსოლუტურად საერთაშორიოს მეთოდოლოგიის ქვეშ მოქცეული და მისი შემოწმება დროდადრო მიმდინარეობს”, - განაცხადა კობა გვენეტაძემ.