Renaissance Capital - თუკი ლარის დინამიკა ქვეყნის ძირითადი სავაჭრო პარტნიორების ვალუტებთან შესაბამისობაში დარჩება, ინფლაციის იმპორტირების რისკები დაბალი იქნება

„საქართველოს ეროვნული ბანკი“ მიჰყვება მოქნილი გაცვლითი კურსის რეჟიმს და შეზღუდული დოზით იყენებს სავალუტო ინტერვენციებს , - ამის შესახებ ნათქვამია Renaissance Capital-ის ანალიტიკურ სტატიაში.

საქართველოს სავალუტო ბაზარზე შექმნილი მდგომარეობის შესახებ მსხვილმა საინვესტიციო ბანკმა Renaissance Capital-მა საკუთარ ვებგვერდზე ანალიტიკური სტატია გამოაქვეყნა. სტატიის თანახმად, 2016 წლის 20 დეკემბერს საქართველოს ეროვნულმა ბანკმა განაცხადა, რომ ლარი იმაზე მეტად გაუფასურდა, ვიდრე ფუნდამენტური პრინციპებით იყო აუცილებელი. ამით დადასტურდა, რომ მზად იყო აუცილებელი ზომები განეხორციელებინა ინფლაციის და გაუფასურების მოლოდინის მოსათოკად.

„ამჯერად ვვარაუდობთ, რომ მომდევნო 9 თვის განმავლობაში განაკვეთის მეტი კლება აღარ მოხდება და პოლიტიკის განაკვეთი 6.5 პროცენტზე შენარჩუნდება 2017 წლის მეოთხე კვარტლამდე მაინც. წლიდან წლამდე შედარებისას ინფლაცია კვლავ 0.2 პროცენტია, ე.ი. მომდევნო წლის მიზნობრივი მაჩვენებლის 4 პროცენტიან ნიშნულზე ბევრად ქვემოთ,“ - ნათქვამია სტატიაში.

სტატიის თანახმად, საერთო ჯამში, საქართველოს ეროვნული ბანკის სავალუტო პოლიტიკა გონივრული და ორთოდოქსულია, თან მცურავი გაცვლით კურსის რეჟიმშია.

„საქართველოს ეროვნული ბანკი მიჰყვება მოქნილი გაცვლითი კურსის რეჟიმს და შეზღუდული დოზით იყენებს სავალუტო ინტერვენციებს, რათა ისეთი ჭარბი სავალუტო რყევები დაიმორჩილოს, რაც ფუნდამენტური ფაქტორებიდან არ მომდინარეობს. ბევრი ქვეყნის ცენტრალური ბანკი იბრალებს ამ მიდგომას, მაგრამ მიგვაჩნია, რომ საქართველოს სავალუტო პოლიტიკის რეჟიმი უდაოდ ძალიან ახლოსაა თავისუფლად მცურავთან. პირველად უნდა ითქვას, რომ საქართველოს ეროვნულ ბანკს აშკარად ესმის, რომ არ არის აუცილებელი ვალუტა გადაფასებული ჰქონდეს, რაც ბუნებრივია დააზიანებდა საქართველოს ეკონომიკურ მოდელს - რეგიონის ლოგისტიკურ, სავაჭრო და მომსახურების ჰაბად ჩამოყალიბების კონცეფციას. მეორეც, თუკი ლარის დინამიკა ქვეყნის ძირითად სავაჭრო პარტნიორების ვალუტებთან შესაბამისობაში დარჩება, ინფლაციის იმპორტირების რისკები დაბალი იქნება, რადგან ნომინალური ეფექტური გაცვლითი კურსის ცვლილება უმნიშვნელო იქნება. მესამეც, უნდა ითქვას, რომ საქართველოს ეროვნულ ბანკს უბრალოდ არ გააჩნია საკმარისი რეზერვები (2.8 მილიარდი აშშ დოლარი ანუ ოთხი თვის იმპორტის ტოლფასი), რათა მოცულობითი ინტერვენციები განახორციელოს სავალუტო ბაზარზე. ამასთან, საქართველოს ეროვნული ბანკი არ იყენებს მონეტარული პოლიტიკის არატრადიციულ ინსტრუმენტებს გაცვლით კურსზე გავლენის მოსახდენად. ასეთი იქნებოდა ლარის ლიკვიდობის შეზღუდვა,“ - ნათქვამია Renaissance Capital -ის სტატიაში.