უცხოელი ექსპერტები - საქართველო ტრამპის ზარს არ უნდა დაელოდოს
საქართველოს მთავრობასა და ტრამპის გარდამავალ გუნდს შორის ოფიციალური კონტაქტი ჯერ არ შემდგარა, - აღნიშნულ თემაზე ”ამერიკის ხმის” ქართული რედაქცია წერს. დონალდ ტრამპი ამერიკის პრეზიდენტის ფიცს 20 იანვარს დადებს. მანამდე არჩეული პრეზიდენტი კაბინეტს აკომპლექტებს და ზოგიერთ ქვეყანასთან - მათ შორის, რუსეთთან ურთიერთობის დეტალებზე საუბრობს. ახალი ამერიკის ფონდის მკვლევარი მაიკლ ჩეჩირე ამბობს, რომ საქართველომ ამ მიმართულებით ნაბიჯები თვითონ უნდა გადადგას.
„ეს, ჩემი აზრით, ის საკითხია, რომელიც საქართველოს მთავრობამ თვითონ უნდა განავითაროს. ტრამპის მომავალი ადმინისტრაცია არ არის კარგად ინტეგრირებული ამერიკის საგარეო პოლიტიკის ესტებლიშმენტში და არ არის ბოლომდე გაცნობიერებული საგარეო პოლიტიკის ნორმებსა და ეტიკეტში”,- განაცხადა ექსპერტმა.
მისივე მოსაზრებით, იმის გამო, რომ მომავალ ადმინისტრაციაში ბევრი ისეთი ადამიანი იქნება დასაქმებული, რომლებიც პოლიტიკისგან დღეს შორს დგანან, ისინი საქმის კეთებას პროცესში ისწავლიან.
“ვფიქრობ, ტრამპს შანსი უნდა მივცეთ და ვნახოთ რა მოხდება. ამასობაში კი საქართველომ ვაშინგტონს საკუთარი თავი უნდა შეახსენოს”, - დასძინა ექსპერტმა.
”ამერიკის ხმის” ქართული რედაქცია წერს, რომ ამერიკის მომავალ პრეზიდენტს ბევრი რთული ურთიერთობა ექნება სამართავი და ამასთან, არაერთი ადგილობრივი თუ საერთაშორისო გამოწვევისთვის მოუწევს თავის გართმევა. სწორედ ამიტომ, ჩეჩირე ამბობს, რომ საქართველომ ყველაფერი უნდა გააკეთოს იმისთვის, რომ ტრამპის გარდამავალ გუნდს თვითონ დაუკავშირდეს.
„საქართველოს აქ [ვაშინგტონში] საელჩო აქვს, ჰყავს ლობისტები, ჰყავს მეგობრები, რომლებსაც შეუძლია დაუკავშირდეს და ხელშეწყობა სთხოვოს. ანუ საქართველოს ამ კავშირის დასამყარებლად რესურსი აქვს”,- აღნიშნავს ექსპერტი.
ჩეჩირეს მიაჩნია, რომ ეს ადვილი დავალება არ იქნება და კონტაქტი რომც შედგეს, არ არის გარანტია, რომ ის წარმატებული იქნება. მთავარი მაინც ის არის, თუ როგორ შეძლებს საქართველო ახალი ადმინისტრაციისთვის თავის წარმოდგენას და იმის ჩვენებას, რომ საქართველო მსოფლიოს უსაფრთხოებაში საკუთარი წვლილი შეაქვს და რომ ის ამერიკის მოკავშირეა.
ევროპის პოლიტიკის ცენტრის ანალიტიკოსი დონალდ ჯენსენი ამბობს, რომ გარდამავალი გუნდი ბოლომდე დაკომპლექტებული ჯერ არ არის და შესაბამისად, მომავალ ადმინისტრაციას პრიორიტეტები ბოლომდე ჩამოყალიბებული არ აქვს. ჩეჩირეს მსგავსად, მას მიაჩნია, რომ კონტაქტის ინიცირება საქართველომ უნდა გააკეთოს.
„მე რომ საქართველოს ადგილზე ვიყო, გარდამავალი გუნდისგან ზარს არ დაველოდებოდი. თუ თბილისს მიაჩნია, რომ რაღაცა მნიშვნელოვანი აქვთ სათქმელი მომავალი ადმინისტრაციისთვის, ინიციატივა უნდა გამოიჩინოს, პროტოკოლის დაცვას ყურადღება არ უნდა მიაქციოს და კონტაქტზე თვითონ გავიდეს. არ მგონია საქართველო ტრამპის ადმინისტრაციის პრიორიტეტი იყოს. ამიტომ მათ დრო არ უნდა დაკარგონ და კონტაქტზე გავიდნენ”, - აღნიშნა ჯენსენმა.
მისივე თქმით, სენატორების ჯონ მაკკეინისა და ლინზი გრეემის რეგიონში ვიზიტი რამდენიმე დღეში მნიშვნელოვანი ნაბიჯია. ამით ისინი ტრამპს სიგნალს უგზავნიან, რომ მათთვის ეს რეგიონი პრიორიტეტს წარმოადგენს. ჯენსენმა ასევე განაცხადა, რომ გასაკვირი არ არის, რომ ტრამპის ადმინისტრაცია რუსეთთან ურთიერთობის გაუმჯობესებას ცდილობს, რადგან ამერიკის ყველა პრეზიდენტი მმართველობის დასაწყისში რუსეთთან ურთიერთობას სწორედ ამ ნაბიჯით იწყებს. თუმცა მან ასევე განაცხადა, რომ ამ მხრივ, ზოგიერთი ფაქტორი მედიაში იმაზე მძიმედაა წარმოდგენილი, ვიდრე ეს სინამდვილეშია.
"ბევრი ქვეყანა გაურკვევლობაშია იმასთან დაკავშირებით, თუ რას მოიმოქმედებს ტრამპი. ამას არც მედია საშუალებები ეხმარება. ვაშინგტონში ლიბერალური საგარო პოლიტიკის ესტებლიშმენტი ყველაფერს, რასაც ტრამპი ამბობს, დიდ ყურადღებას აქცევს”,- განაცხადა ჯენსენმა.
მისივე აზრით, ამით მედია ცუდი ვითარების შეგრძნების გაჩენას ცდილობს.
"ვფიქრობ, ტრამპს შანსი უნდა მივცეთ და ვნახოთ, რა მოხდება. ამასობაში კი, საქართველომ ვაშინგტონს საკუთარი თავი უნდა შეახსენოს“,- დასძინა ჯენსენმა.
”ამერიკის ხმის” ქართული რედაქცია წერს, რომ ტრამპის საგარეო პოლიტიკის შტრიხები ჯერ ისევ არ არის ჩამოყალიბებული.
”ერთი რამ, რაც ტრამპის განცხადებებზე დაყრდნობით ვიცით, არის ის, რომ არჩეული პრეზიდენტი რუსეთთან ურთიერთობის გამოსწორებას ეცდება. არ ვიცით ის, თუ რა დათმობებზე წასასვლელად იქნება ის მზად ამ მიზნის მისაღწევად. ანალიტიკოსები, რომლებსაც ჩვენ ვესაუბრეთ, თანხმდებიან, რომ მიუხედავად იმისა, თუ როგორი შეიძლება იყოს ტრამპის საგარეო პოლიტიკა, საქართველომ მის გარდამავალ გუნდთან კონტაქტი თვითონ უნდა დაამყაროს და ვაშინგტონიდან ზარს არ დაელოდოს”, - წერს ”ამერიკის ხმის” ქართული რედაქცია.