მტაცებელი ცხოველების მონადირებაზე შესაძლოა სანქციები აღარ გავრცელდეს

მტაცებელი ცხოველების მონადირებაზე შესაძლოა “ადმინისტრაციულ სამართალდარღვევათა კოდექსით“ დადგენილი სანქციები აღარ გავრცელდეს.

ამასთან დაკავშირებით გარემოს დაცვისა და ბუნებრივი რესურსების კომიტეტმა ე.წ. სამუშაო შეხვედრის ფორმატში, მოქალაქე გიორგი ლაბაძის საკანონმდებლო წინადადება განიხილა, რომლის გათვალისწინებით, კოდექსის 86-ე მუხლით (თევზჭერისა და ნადირობის წესების დარღვევა, აგრეთვე ცხოველთა სამყაროს ობიექტებით სხვაგვარი სარგებლობის წესების დარღვევა) გათვალისწინებული ჯარიმები და ადმინისტრაციული პასუხისმგებლობა მტაცებელი ცხოველების მონადირებაზე არ გავრცელდება. უფრო კონკრეტულად, პარლამენტში წარდგენილი პროექტის მიხედვით, კოდექსს ემატება პუნქტი, რომლის მიხედვით, ისეთი ცხოველების მონადირება, რომელთა სიმრავლეც სერიოზულ საფრთხეს უქმნის ადამიანის სიცოცხლეს, ასევე სოფლის მეურნეობის წარმართვასა და განვითარებას, ნადირობის წესების დარღვევად არ ჩაითვლება. ამ კონტექსტში ყურადღება მგელსა და ტურაზე გამახვილდა.

კომიტეტის თავმჯდომარის პირველი მოადგილე ზაზა ხუციშვილი ფიქრობს, რომ პრობლემა საყოველთაოა, რასაც შინაურ ცხოველებზე მტაცებლების თავდასხმის გახშირებული ფაქტები ადასტურებს. ხუციშვილის აზრით, მგლების რაოდენობის შემცირების მიზნით გარკვეული რეგულაცია უნდა დაწესდეს.

“ამის თქმის უფლებას მაძლევს ინფორმაცია, რომელიც ევროპის ქვეყნებში მგლების რაოდენობასთან დაკავშირებით გამაჩნია: - გერმანიაში არის 165 ათასი ირემი და 12 მგელი, საფრანგეთში არის 100 ათასი ირემი და 40 მგელი, დიდ ბრიტანეთში არის 365 ათასი ირემი და არც ერთი მგელი. დანიაში, ავსტრიაში, შვეიცარიაში არც ერთი მგელი არ არის და არის უამრავი ჩლიქოსანი ცხოველი. შედარებით მეტი მგელია იტალიაში, მაგრამ არის ირმის რაოდენობის 1%. მგელზე ნადირობა უნდა იყოს დაშვებული, მაგრამ უნდა განისაზღვროს მათი ზუსტი რაოდენობა, თუ რამდენის ამოღება იქნება საჭირო იმისთვის, რომ აღარ იყოს თავდასხმები როგორც მოსახლეობაზე, ასევე შინაურ პირუტყვზე“, - განაცხადა ხუციშვილმა

გარემოს დაცვის სამინისტროს ბიომრავალფეროვნებისა და სატყეო დეპარტამენტის ხელმძღვანელის კარლო ამირგულაშვილის ინფორმაციით, მგლების თავდასხმის თაობაზე თითქმის ყველა მუნიციპალიტეტიდან ყოველ კვირას იღებენ წერილს და მგლების ამოღებაზე ნებართვებსაც გასცემენ, მაგრამ ეს დროში გაჭიანურებული პროცესია და საჭიროა საკანონმდებლო ცვლილებების განხორციელება. მისივე თქმით, არის სხვა სერიოზული პრობლემებიც, რის გამო გახშირებულია მგლების თავდასხმებიც. მათ შორის, უშუალოდ სოფლის სიახლოვეს გაჩენილი ნაგავსაყრელები, ხშირ შემთხვევაში საძოვარზე უპატრონოდ გაშვებული პირუტყვი, სათანადოდ დაუცველი სადგომები. პრობლემის მოგვარებას ხელს პროფესიონალ მონადირეთა კადრების უქონლობაც უშლის.

სამუშაო შეხვედრაზე შეთანხმდნენ, რომ პარლამენტი და სამინისტრო პრობლემის დარეგულირების გზებზე შეჯერდებიან, რომლებიც კანონმდებლობაში აისახება.