დიმიტრი ქუმსიშვილი - „რუსთავი 2” თვიდან თვემდე იგროვებს საბიუჯეტო დავალიანებას, თუმცა ჩვენ მივიღეთ გადაწყვეტილება, არ გამოგვეყენებინა ის ზომები, რომელთა გამოყენებაც შეგვიძლია

იმის მიუხედავად, რომ „რუსთავი 2” თვიდან თვემდე იგროვებს საბიუჯეტო დავალიანებას, ჩვენ, როგორც საგადასახადო ხელისუფლებამ, მივიღეთ გადაწყვეტილება არ გამოგვეყენებინა ის ზომები, რომელთა გამოყენებაც შეგვიძლია , - ამის შესახებ პირველმა ვიცე-პრემიერმა, ფინანსთა მინისტრმა დიმიტრი ქუმსიშვილმა „რუსთავი 2”- ის შესახებ დასმული კითხვის საპასუხოდ განაცხადა.

მისი თქმით, აღნიშნული გადაწყვეტილებაც მეტყველებს იმაზე, რომ ხელისუფლება „რუსთავი 2“-თან დაკავშირებულ პროცესში არ ერევა.

„სწორედ იმიტომ, რომ ხელისუფლება არ ჩარეულიყო არანაირად ამ დავაში, ჩვენ, როგორც საგადასახადო ხელისუფლებამ, მივიღეთ გადაწყვეტილება, იმის მიუხედავად, რომ „რუსთავი 2” თვიდან თვემდე იგროვებს საბიუჯეტო დავალიანებას, არ გამოგვეყენებინა ის ზომები, რომელთა გამოყენებაც ჩვენ შეგვიძლია. ეს არის ნათელი მაგალითი, როგორ არ ერევა ხელისუფლება აღნიშნულ პროცესში და რამდენად ნეიტრალურ პოზიციას ინარჩუნებს”, - განაცხადა ქუმსიშვილმა.