სემეკ-ში „ყაზტრანსგაზ თბილისისა“ და “გაზის ტრანსპორტირების კომპანიისათვის“ ტარიფების დადგენის მიზნით ადმინისტრაციული წარმოებები დაიწყო
ენერგეტიკისა და წყალმომარაგების მარეგულირებელმა ეროვნულმა კომისიამ 9 მარტის საჯარო სხდომაზე „ყაზტრანსგაზ თბილისისათვის“ გაზის მიწოდების, განაწილების, გატარებისა და მოხმარების ტარიფების დადგენის მიზნით საჯარო ადმინისტრაციული წარმოების დაწყების შესახებ იმსჯელა.
როგორც ”ინტერპრესნიუსს” სემეკიდან აცნობეს, კომისიაში წინადადებების წარდგენის ბოლო ვადად განისაზღვრა მიმდინარე წლის 6 აპრილი, ხოლო კომისიის მიერ გადაწყვეტილების მიღების ბოლო ვადად - მიმდინარე წლის 24 ივლისი.
ამავე სხდომაზე დაიწყო საჯარო ადმინისტრაციული წარმოება შპს „საქართველოს გაზის ტრანსპორტირების კომპანიისთვის“ ბუნებრივი გაზის ტრანსპორტირების ტარიფების დადგენის თაობაზე. კომისიაში წინადადებების წარდგენის ბოლო ვადად დასახელდა მიმდინარე წლის 6 აპრილი, ხოლო კომისიის მიერ გადაწყვეტილების მიღების ბოლო ვადად - მიმდინარე წლის 28 ივლისი.
როგორც სემეკ-ში აცხადებენ, მიმდინარე წლის 6 აპრილის 18:00 საათამდე ნებისმიერ დაინტერესებულ პირს შესაძლებლობა აქვს კომისიაში წარადგინოს მოსაზრებები შპს „ყაზტრანსგაზ თბილისისა“ და შპს „საქართველოს გაზის ტრანსპორტირების კომპანიისთვის“ ტარიფების დადგენასთან დაკავშირებით. დაინტერესებული პირი უფლებამოსილია მოსაზრებების წარდგენისას არ მიუთითოს თავისი ვინაობა.