ალექსანდრე ჯეჯელავა - აზარტულ თამაშებში არასრულწლოვნების ჩართვის აღმოფხვრის მიმართულებით აქტიური კამპანია უახლოეს მომავალში დაიწყება
ჩვენს ხელთ არსებული ყველა ინსტრუმენტით უნდა ვიქადაგოთ იმ აღუდგენელი ზიანის შესახებ, რომელიც აზარტულმა თამაშებმა შეიძლება მიაყენოს ბავშვს , - ამის შესახებ ”პალიტრანიუსის” გადაცემაში ”360 გრადუსი” ვიცე-პრემიერმა, განათლების მინისტრმა, ალექსანდრე ჯეჯელავამ განაცხადა.
მისი თქმით, ონლაინ დარღვევებისა და დანაშაულების გამოვლენა ძნელია. მინისტრის განცხადებით, მოქმედი კანონმდებლობა ამ მიმართულებით ეფექტურია, თუმცა ახლა ეფექტური დანაშაულის გამოვლენის შემთხვევები უნდა გახდეს.
ალექსანდრე ჯეჯელავას თქმით, აზარტულ თამაშებში არასრულწლოვნების ჩართვის აღმოფხვრის მიმართულებით აქტიური კამპანია უახლოეს მომავალში დაიწყება. ”მთავარი ამოცანა ცნობიერების ამაღლებაშია. ახალგაზრდა შეიძლება ვერ ხვდებოდეს, თუ რამხელა საფრთხის მატარებელია ონლაინ კაზინოებში 50 თეთრით ან 1 ლარით დაწყებული თამაში. მთავარი, რაც ჩვენ უნდა გავაკეთოთ და ჩვენ ამ მიმართულებით ვმუშაობთ, ის არის, რომ ყველა სკოლაში ჩვენს ხელთ არსებული ყველა ინსტრუმენტით უნდა ვიქადაგოთ იმ აღუდგენელი ზიანის შესახებ, რომელიც აზარტულმა თამაშებმა შეიძლება მიაყენოს ბავშვს.
კანონმდებლობა ძალიან ეფექტურია, ამაზე ეფექტური ვერ იარსებებს, ახლა ეფექტური უნდა გახდეს გამოვლენის შემთხვევები, თუმცა, ონლაინ დანაშაულის გამოვლენა ძალიან რთულია. ვფიქრობ დიდი დრო და დამატებითი რესურსები არ დასჭირდება, რომ ჩვენ დავიწყოთ ახალი კამპანია ამ მიმართულებით. სკოლა უნდა იყოს მზად, სრულიად ახლად გაჩენილ პრობლემებს და გამოწვევებს გავართვათ თავი”, - განაცხადა ალექსანდრე ჯეჯელავამ.
იხილეთ ვიდეო PALITRATV-ზე