„ტრანსპორტისა და გზების ასოციაცია“ საქალაქთაშორისო მიკროავტობუსებში სიჩქარის საზომი მოწყობილობის დამონტაჟების ინიციატივით გამოდის
„ტრანსპორტისა და გზების ასოციაციის“ თავმჯდომარე დავით მესხიშვილი საქალაქთაშორისო მიმართულებით მოძრავ მიკროავტობუსებში ე.წ. ტაქოგრაფების დამონტაჟების ინიციატივით გამოდის.
როგორც დავით მესხიშვილმა განაცხადა, უნდა დაინერგოს ევროდირექტივა, რომელიც ითვალისწინებს ე.წ. ტაქოგრაფების - ჩამწერი მოწყობილობების დამონტაჟებას. მისივე თქმით, მოწყობილობა აჩვენებს, რა მონაკვეთზე, რა სიჩქარით მოძრაობს მძღოლი, რაც დამრღვევი მძღოლების გამოვლენის მარტივი საშუალებაა.
„პირველ რიგში, ვითხოვთ, ევროდირექტივის დანერგვას, რომელიც ითვალისწინებს მიკროავტობუსებში ჩამწერი მოწყობილობების - ე.წ ტაქოგრაფების ჩამონტაჟებას. ასეთ დროს, არ არის საჭირო საპატრულო პოლიციამ ყველა დარღვევაზე სდიოს მიკროავტობუსის დამრღვევ მძღოლს - ტაქოგრაფის სისტემა აჩვენებს, რა მონაკვეთზე, რა სიჩქარით იარა მძღოლმა, რაც არის ერთგვარი პრევენცია და ვეროკავშირის ქვეყნებში საკმაოდ აპრობირებული მეთოდი“, - განაცხადა დავით მესხიშვილმა.
კვლევის „უსაფრთხო გადაადგილების შესაძლებლობები მგზავრებისთვის“ მიხედვით, საქალაქთაშორისო მარშრუტზე მოძრავი მიკროავტობუსების მძღოლების 93% მინიმუმ ერთ დარღვევას მაინც აკეთებს.