„საქართველოს რკინიგზის“ ადმინისტრაციულ შენობაში „ელექტრონული ნარჩენებისთვის“ ყუთები დაიდგა

სს „საქართველოს რკინიგზის“ ადმინისტრაციულ შენობაში „ელექტრონული ნარჩენებისთვის“ ყუთები დაიდგა.

როგორც „საქართველოს რკინიგზიდან“ იუწუყებიან, რკინიგზა პირველი კომპანიაა საქართველოში, რომელიც ორგანიზაცია "Enviroserve"-ის მიერ მოწყობილ აქციაში - „ერთად ვებრძოლოთ ელექტრონულ ნარჩენებს!“ ჩაერთო.

"Enviroserve" არის საერთაშორისო კომპანია, რომელიც სპეციალიზდება ელექტრონული მოწყობილობების გადამუშავების კუთხით. კომპანიის სათავო ოფისი და გადამამუშავებელი ქარხანა მდებარეობს დუბაიში, მათი საქართველოში საქმიანობა დამოწმებულია საქართველოს გარემოსა და ბუნებრივი რესურსების დაცვის სამინისტროს მიერ. ცნობისთვის: "E-Waste" ანუ „ელექტრონულ ნარჩენებს“ განეკუთვნება ისეთი სახის ნარჩენები, რომლებიც შეიძლება გადაიყაროს, მაგალითად, ძველი მობილური ტელეფონები, ელექტრო საოფისე მოწყობილობა, კომპიუტერები და ელექტროობასთან დაკავშირებული დეტალები, როგორიცაა: საპარსები, კბილის ელექტროჯაგრისები, მელნის კარტრიჯები და ა.შ“, - აცხადებენ „საქართველოს რკინიგზაში“.

მათივე თქმით, ელექტრონული ნარჩენები საშიშია, ვინაიდან შეიცავს ისეთ ტოქსიკურ ნივთიერებებს, როგორიცაა: ვერცხლის წყალი, ტყვია, ბერილიუმი და კადმიუმი, რომლებიც კანცეროგენულობით ხასიათდებიან და თავის ტვინისა და თირკმლის დაზიანებას (განსაკუთრებით ბავშვებში) იწვევს.

„GreenPeace ორგანიზაციის მონაცემების თანახმად, მთელი მსოფლიოს მასშტაბით, ელექტრონული ნარჩენები მუნიციპალური მყარი ნარჩენების 5%-ს წარმოადგენს. "E-Waste" შესაგროვებელი ყუთები განთავსებულია სს „საქართველოს რკინიგზის“ ოფისის შესასვლელში და რკინიგზის თანამშრომლებს შესაძლებლობა აქვთ გამოუსადეგარი ელექტრონული ნარჩენები მასში ნებისმიერ დროს ჩაყარონ“, - აცხადებენ „საქართველოს რკინიგზაში“.

მათივე თქმით, სს „საქართველოს რკინიგზა“ კიდევ ერთ პროექტში მონაწილეობს. პროექტი „ერთად გავუფრთხილდეთ გარემოს“ ითვალისწინებს სხვადასხვა დაწესებულებებში ე.წ. „მწვანე ყუთების“ დადგმას, რომელშიც ორგანიზაციის თანამშრომლები მაკულატურას განათავსებენ.

„კომპანიაში ყოველდღიურად ნარჩენი ქაღალდის დიდი რაოდენობა გროვდება, რომელიც, ნაგვის ყუთებში ჩაყრის ნაცვლად, შეიძლება მეორადად გადამუშავდეს ახალი პროდუქციის წარმოებისთვის. შეგროვებული ნარჩენი ქაღალდი გადასამუშავებლად გადაეცემა გაზეთ „კვირის პალიტრის“ პროექტს „გაცვალე მაკულატურა ლიტერატურაზე!“. ჩაბარებული მაკულატურის სანაცვლოდ, სპეციალურ პლასტიკურ ბარათზე, ქაღალდის წონის შესაბამისად, ქულები – ე.წ. „ნერგები“ ირიცხება. ბარათზე დარიცხულ ქულებს სს „საქართველოს რკინიგზა“ „პალიტრა მედიის“ ახალ წიგნებში ცვლის, რომელიც მატარებელში განთავსებულ ბიბლიოთეკებში დარიგდება“, - განაცხადეს „საქართველოს რკინიგზაში“.