საერთაშორისო სარეიტინგო კომპანია Fitch მიიჩნევს, რომ უკრაინის კრიზისი რუსულ ეკონომიკაზე წნეხს გააძლიერებს და რისკების ზრდასაც ხელს შეუწყობს, მათ შორის, ვალუტის გაუფასურებისა და კაპიტალის გადინების კუთხით.
უცხოელი ანალიტიკოსების აზრით, ჩრდილოეთში პოლიტიკურ-ეკონომიკური მდგომარეობა ჯერ კიდევ არაპროგნოზირებადია, თუმცა, რუსეთის სუვერენული საკრედიტო პროფილი კვლავ საიმედოდ რჩება. შესაბამისად, საერთაშორისო სარეიტინგო კომპანიამ მინიჭებული რეიტინგი BBB (”სტაბილური”) უცვლელი დატოვა.
3 მარტს ყირიმში რუსეთის შეჭრის შემდეგ ბაზარზე პანიკა დაიწყო, რუბლი ამერიკულ დოლართან მიმართებაში 2,2%-ით, ისტორიულ მინიმუმამდე გაუფასურდა. ამავე დროს მოსკოვის საერთაშორისო სავალუტო ბირჟის ინდექსი 10,8%-ით შემცირდა.რუსეთის ცენტრალურმა ბანკმა რუბლის მხარდასაჭერად საპროცენტო განაკვეთი 150 საბაზისო პუნქტით, 7%-მდე გაზარდა და 11 მილიარდი დოლარი გაყიდა. თუმცა, მეორე დღეს სიტუაცია შედარებით დარეგულირდა.