ლევან დავითაშვილი - საოპერაციო ხარჯები 10%-ით შევამცირეთ
სოფლის მეურნეობის სამინისტრო სახელმწიფოს მიერ გამოცხადებულ ოპტიმიზაციას განაგრძობს, - ამის შესახებ ჟურნალისტებს სოფლის მეურნეობის მინისტრმა ლევან დავითაშვილმა განუცხადა.
მისი თქმით, ძირითადი ოპტიმიზაცია უწყების ცენტრალურ აპარატს შეეხო, ასევე 10%-ით შემცირდა საოპერაციო ხარჯები.
უწყების ხელმძღვანელს გათავისუფლებული თანამშრომლების რაოდენობა არ დაუკონკრეტებია, თუმცა აღნიშნა, რომ ოპტიმიზაცია რამდენიმე ასეულ ადამიანს შეეხო.
”სახელმწიფოს მიერ გამოცხადებული ოპტიმიზაციის პოლიტიკა ყველა უწყებისთვის თანაბარია, შესაბამისად, სოფლის მეურნეობის სამინისტრო ამ პოლიტიკას აგრძელებს. ჩვენ გარკვეული ოპტიმიზაცია მოვახდინეთ ცენტრალურ აპარატში ვაკანსიების ხარჯზე, 10%-ით შევამცირეთ საოპერაციო ხარჯები. ოპტიმიზაციის პერიოდი გრძელდება, არის საოპერაციო საქმიანობები, სადაც რა თქმა უნდა, სწორი ანალიზის შედეგად, სწორი რეფორმებია ჩასატარებელი. კონკრეტულ ციფრს ვერ მოგახსენებთ, ჩვენ მაქსიმალურად ვცადეთ ცენტრალურ აპარატში ბიოროკრატიულ ნაწილში ეს ყოფილიყო ნაკლებად მძიმე, რადგან სამინისტროს საქმიანობის ეფექტი არ უნდა შემცირდეს. მიუხედავად ამისა, მთელ რიგ საოპერაციო ნაწილში, ისეთში, როგორიც არის სახელმწიფო კომპანიები, საკმაოდ მნიშვნელოვანი ოპტიმიზაცია გვქონდა, საუბარია რამდენიმე ასეულ ადამიანზე”, - განაცხადა დავითაშვილმა.