მთიანი აჭარის პოპულარიზაციის მიზნით ინფოტურები დაიწყო
მთიანი აჭარის ტურისტული მარშრუტების პოპულარიზაციის მიზნით, აჭარის ტურისტული პროდუქტების განვითარების სააგენტო ინფოტურებს იწყებს.
როგორც აჭარის ტურიზმის დეპარტამენტის პრესსამსახური იუწყება, პირველი ტურის ფარგლებში რეგიონში მოქმედი ტურისტული სააგენტოების წარმომადგენლებმა ქედის ახალი ტურისტული მარშრუტი - გობრონეთის ტური გაიარეს.
ინფოტურის მონაწილეებმა მარშრუტზე არსებული ტურისტული ღირსშესანიშნაობები დაათვალიერეს და გობრონეთში არსებული საოჯახო-სასტუმრო სახლები მოინახულეს. ტურისტული სააგენტოების წარმომადგენლები ასევე გაეცნენ საოჯახო სახლების სერვისებსა და ურთიერთანამშრომლობის პირობებს.
ქედაში, გობრონეთის მარშრუტი იმ ახალ ტურისტულ მარშრუტებს შორისაა, რომელსაც აჭარის ტურიზმის დეპარტამენტის ტურისტული პროდუქტების განვითარების სააგენტო ტურისტებს სთავაზობს. მიმდინარე წელს, სააგენტო დამატებით ოთხი ტურისტული მარშრუტის მარკირება-განვითარებაზე მუშაობს. რაც შეეხება ინფოტურებს, წლის ბოლომდე მთიანი აჭარის ტურისტული მარშრუტების მიმართულებით 15-მდე ინფოტურის ორგანიზება იგეგმება. შემდეგი ინფოტური 11 მაისს, მაჭახელას ტურისტული მარშრუტის მიმართულებით ჩატარდება.