აჭარის მთავრობის სარეზერვო ფონდიდან 32 ეკომიგრანტი ოჯახისთვის 800 000 ლარი გამოიყოფა
აჭარის ავტონომიურ რესპუბლიკაში სტიქიური მოვლენების შედეგად მიყენებული ზარალის სალიკვიდაციო შერეული სამთავრობო კომისიის დღევანდელ სხდომაზე ხულოს მუნიციპალიტეტის სოფელ თხილვანაში მცხოვრები 32 ეკომიგრანტი ოჯახის საკითხი განიხილეს , - ამის შესახებ აჭარის მთავრობა იუწყება.
მათივე ინფორმაციით, აღნიშნულ ოჯახებს, საცხოვრებელი ფართებით უზრუნველყოფის მიზნით, აჭარის მთავრობის სარეზერვო ფონდიდან 800 000 ლარი გამოეყოფა.
„კომისიის სარეკომენდაციო წერილი დასამტკიცებლად აჭარის მთავრობის თავმჯდომარეს უახლოეს დღეებში გადაეგზავნება. გარდა აღნიშნულისა, თხილვანაში მცხოვრები 27 ეკომიგრანტი ოჯახის 25 000-25 000 ლარით უზრუნველყოფის საკითხი სამთავრობო კომისიამ მაისის დასაწყისში განიხილა, ისინი თანხას უახლოეს დღეებში მიიღებენ.
ჯამში, სოფელ თხილვანაში მცხოვრებ 59 ეკომიგრანტ ოჯახს 1 475 000 ლარი გამოეყოფა. 2 ეკომიგრანტი ოჯახის ბინებით დაკმაყოფილების საკითხი ხულოს სოციალურ სახლში განიხილება. სოფელ თხილვანაში მეწყერული პროცესები მიმდინარე წლის დასაწყისში გააქტიურდა. სტიქიამ საფრთხე ათობით ოჯახს შეუქმნა.
კომისიამ სხდომაზე, ასევე გახილა ხულოს მუნიციპალიტეტში სტიქიის შედეგად დაზარალებული საცხოვრებელი სახლების აღდგენა-გამაგრებას დაქვემდებარებული 3 ოჯახის და ადგილმონაცვლეობას დაქვემდებარებული 3 ოჯახის ფინანსური დახმარების გაწევის საკითხი. ასევე, მოხდა ხელვაჩაურის მუნიციპალიტეტის გამგეობის შუამდგომლობის განხილვა სტიქიის შედეგად დაზარალებული ორი და ხანძრის შედეგად დაზარალებული ერთი ოჯახის ფინანსური დახმარების თაობაზე.
სტატისტიკის მიხედვით, 2017 წელს უსაფრთხო საცხოვრისის შესაძენად თანადაფინანსება გაიცა 25 ოჯახზე. 9 ოჯახს უსასყიდლოდ საკუთრებაში გადაეცა ბინა. 2017 წელს აჭარის მთავრობის სარეზერვო ფონდიდან სტიქიითა და ხანძრით დაზარალებულ 27 ოჯახზე გაიცა - 279 022 ლარი. 2016 წელს საცხოვრებლით დაკმაყოფილდა 117 ეკომიგრანტი ოჯახი. 61 ოჯახზე გაიცა ფინანსური დახმარება 698 050 ლარის ოდენობით“, - აღნიშნულია აჭარის მთავრობის ინფორმაციაში.